کراچی : پاکستان ٹیلی وژن کی سینئر اداکارہ روبینہ اشرف کا کہنا ہے کہ میں نے اپنے شوہر کے ساتھ مل کر اپنی زندگی بہتر بنانے میں بہت محنت کی ہے۔
پاکستان شوبز کی باصلاحیت اداکارہ ہدایت کارہ اور پروڈیوسر روبینہ اشرف نے پاکستان کے کئی نامور ڈراموں میں اپنی صلاحیتوں کے جوہر دکھائے جن میں کسک، ہزاروں راستے، تپش اور بدلتے موسم کے علاوہ گل رانا اور دو بول سمیت دیگر ڈرامے بھی شامل ہیں۔
سینئر اداکارہ روبینہ اشرف نے اے آر وائی ڈیجیٹل کی رمضان اسپیشل ٹرانسمیشن "شان سحر” میں میزبان ندا یاسر کے شو میں شرکت کی۔
میزبان ندا یاسر کی جانب سے پوچھے گئے ایک سوال کے جواب میں ان کا کہنا تھا کہ ایک ایسا وقت بھی زندگی میں آتا ہے جب ہمیں زندگی سے کچھ چاہئے ہوتا ہے اور ذمہ داری بھی ہم نے خود ہی لی ہو لیکن ضروری نہیں کہ اس کیلئے کسی بھی گھر کے فرد سے کچھ مانگیں۔ اس کیلئے مسلسل محنت اور جدوجہد نہایت ضروری ہے۔
روبینہ اشرف کا کہنا تھا کہ میرے بچے جب چھوٹے تھے تو ان کی ذمہ داری کے ساتھ گھر بنانے کیلئے بھی بہت محنت کرنا پڑی اور جب آپ کو آپ کی محنت کا پھل مل جاتا ہے تو جو خوشی اس وقت محسوس ہوتی ہے وہی زندگی محسوس ہوتی ہے۔
ایک سوال کے جواب میں انہوں نے کہا کہ زندگی میں کوئی بھی شخص جو آپ کی تعریف کرتا ہے اسے بے شک سیریس نہ لیں لیکن جو آپ کو آپ کی خامیاں بتائے اس کو ضرور اپنے ساتھ رکھیں۔
یاد رہے کہ عالمی وبا کورونا وائرس کے جب دنیا بھر میں وار جاری تھے اس دوران پاکستان میں بھی متعدد سیاست دانوں سمیت معروف شخصیات بھی اس وائرس سے متاثر ہوئی تھیں جن میں اداکارہ روبینہ اشرف بھی شامل تھیں۔
اداکارہ روبینہ اشرف کو ایک ڈرامے کی شوٹنگ کے دوران ہی کوویڈ ہوگیا تھا جس کی وجہ سے ڈرامے کی شوٹنگ روکنا پڑی اور ان کے صحت یاب ہونے کے بعد تقریباً ڈیڑھ ماہ بعد یہ ڈرامہ مکمل کیا گیا۔ اداکارہ روبینہ اشرف نے بتایا کہ جب انہیں کوویڈ ہوا تو وہ شروع کا ایک ہفتہ گھر میں ہی رہیں لیکن جب ان کی طبیعت بگڑنے لگی تو انہیں ہسپتال منتقل کیا گیا۔
