اسلام آباد : حکمران اتحاد نے چیف جسٹس سپریم کورٹ سے مطالبہ کیا ہے کہ وزیراعلی ٰپنجاب سے متعلق مقدمے کی سماعت فل بینچ کرے۔
تفصیلات کے مطابق حکمران اتحاد کی جانب سے مشترکہ متفقہ اعلامیہ جاری کردیا گیا ، جس میں چیف جسٹس سپریم کورٹ سے مطالبہ کیا گیا ہے کہ سپریم کورٹ کا فل بینچ وزیراعلی ٰپنجاب سےمتعلق مقدمے کی سماعت کرے۔
،حکمران اتحاد کا کہنا تھا کہ سپریم کورٹ بارکی نظرثانی اورمتعلقہ درخواستوں کی ایک ساتھ سماعت کی جائے اور ایک ساتھ سماعت کر کے فیصلہ صادر کیا جائے، معاملات بہت اہم قومی اورسیاسی ہیں۔
اعلامیے میں کہا گیا کہ سیاسی عدم استحکام کی قیمت عوام مہنگائی،بےروزگاری ، غربت کی صورت اداکررہےہیں۔
حکمران اتحاد نے کہا کہ عمران خان بار بار سیاست میں انتشار پیدا کر رہا ہے ، انتشار کا مقصد احتساب سےبچنا، کرپشن چھپانا اورچور دروازے سےاقتدارحاصل کرنا ہے۔
متفقہ اعلامیے میں کہنا تھا کہ آئین نے مقننہ، عدلیہ اور انتظامیہ میں اختیارات کی واضح لکیر کھینچی ہوئی ہے ، اختیارات کی لکیرمتکبر آئین شکن فسطائیت کاپیکر مٹانے کی کوشش کر رہا ہے۔
حکمران اتحاد نے مزید کہا کہ دراصل عمران آئین، عوام کےحق حکمرانی اور جمہوری نظام معیشت کی طرح دیوالیہ کرانا چاہتا ہے، یہ سوچ اور رویہ پاکستان کے ریاستی نظام کےلئے دیمک بن چکی ہے۔
اعلامیے کے مطابق آئین، جمہوریت اور عوام کے حق حکمرانی پر ہر گز کوئی سمجھوتہ نہیں ہوگا،ہر فورم اورہر میدان میں تمام اتحادی جماعتیں مل کر آگے بڑھیں گی اور اتحادی جماعتیں فسطائیت کے سیاہ اندھیروں کا ڈٹ کر مقابلہ کریں گی۔
