ماسکو : روس کی وزارت خارجہ نے برطانیہ کے 23 شہریوں کے روس میں داخلے پر پابندی عائد کردی، جن میں مسلح افواج، میڈیا نمائندے، عدلیہ اور دیگر شامل ہیں۔
غیرملکی خبر رساں ادارے کی رپورٹ کے مطابق مذکورہ افراد اور تنظیموں کے خلاف روسی حکومت نے یہ اقدام برطانیہ کی یکطرفہ پابندیوں کے ردعمل میں کیا ہے۔
روسی دفترخارجہ کی جانب سے جاری کردہ تحریری اعلامیہ میں کہا گیا ہے کہ برطانیہ نے بعض روسی شہریوں اور فرموں پر یکطرفہ طور پر پابندیاں عائد کی ہیں اور یوکرین کو فوجی تیکنیکی امداد فراہم کی ہے۔
اسی بنا پر23 برطانوی شہریوں کے روس میں داخلے پر پابندی عائد کی گئی ہے۔ اعلامیہ میں کہا گیا ہے کہ ان میں یوکرینی فوجیوں کو تربیت دینے والے فوجی ماہرین، بعض میڈیا اداروں سمیت عدالتوں اور جیلوں کے متعدد عہدیداران شامل ہیں۔
یاد رہے کہ روس نے گزشتہ برس برطانوی صحافی، دفاعی صنعت کے ناظمین اور فوجی عہدیداروں پر مشتمل 49 افراد اور بعد ازاں سابق برطانوی وزیراعظم ڈیوڈ کیمرون سمیت 39 برطانوی شہریوں کے ملک میں داخلے پر پابندی عائد کی تھی۔
