اسلام آباد: روسی وزیر خارجہ سرگئی لاروف وفد کے ہمراہ 2 روزہ دورے پر پاکستان پہنچ گئے۔
تفصیلات کے مطابق سرگئی لاروف اسلام آباد پہنچ گئے، وزیر خارجہ شاہ محمود قریشی نے معزز مہمان کا پُر تپاک خیر مقدم کیا، سرگئی لاروف کل وزارت خارجہ کا دورہ کریں گے۔
وزارت خارجہ میں پاکستان اور روس کے وفد کی سطح پر مذاکرات ہوں گے، شاہ محمود پاکستانی وفد جب کہ سرگئی لاروف روسی وفد کی قیادت کریں گے۔
مذاکرات میں کثیرالجہتی شعبہ جات میں دو طرفہ تعاون پر تبادلہ خیال ہوگا، اقتصادی روابط کے فروغ، علاقائی و عالمی سمیت باہمی دل چسپی کے امور پر گفتگو ہوگی۔
روسی وزیر خارجہ وزیر اعظم عمران خان اور دیگر اعلیٰ قیادت سے بھی ملاقاتیں کریں گے۔
توقع کی جا رہی ہے کہ روسی وزیر خارجہ کا یہ دورہ، پاکستان اور روس کے مابین دو طرفہ تعلقات کو بڑھانے اور مزید مستحکم بنانے میں مددگار ثابت ہوگا۔
