کیف: روس یوکرین جنگ کی شدت برقرار ہے، روس نے گزشتہ روز جنوبی اور مشرقی یوکرین میں گولہ باری کی، جس سے 4 افراد ہلاک ہو گئے۔
تفصیلات کے مطابق یوکرینی علاقوں پر روسی گولہ باری کا سلسلہ جاری ہے، جنوبی اور مشرقی یوکرین میں روسی گولہ باری سے گزشتہ روز مزید چار افراد ہلاک ہو گئے ہیں۔
دوسری جانب جی سیون ممالک نے یوکرین کو مزید فوری فوجی امداد فراہم کرنے کا اعلان کر دیا، امریکی صدر جو بائیڈن نے یوکرینی ہم منصب سے رابطہ کر کے جنگ سے متعلق تبادلہ خیال کیا۔
امریکی صدر نے کہا کہ یوکرین کے فضائی دفاع کو مضبوط کرنا ہماری ترجیحات میں شامل ہے، برطانیہ نے بھی یوکرین کو طویل فاصلے تک مار کرنے والے میزائل فراہم کرنے کا اعلان کر دیا ہے۔
ادھر اقوام متحدہ نے انکشاف کیا ہے کہ یوکرین جانے والے ہتھیار دہشت گردوں سے برآمد ہو رہے ہیں، اقوام متحدہ کی نائب سربراہ اور ہتھیاروں کے انخلا کے امور میں بین الاقوامی ادارے کی سینیئر مندوب ایزومی ناکامتسو نے کہا کہ یوکرین کو دیے جانے والے ہتھیار روس سے بر سرپیکار نیم فوجی گروہوں کے علاوہ بلیک مارکیٹوں میں بھی دیکھے گئے ہیں۔
