پاکستان کی معروف اداکارہ صبا قمر نے آنجہانی اداکار عرفان خان سے موت سے قبل رابطے میں نہ رہنے پر افسوس کا اظہار کر دیا ہے۔
اداکارہ صبا قمر نے آج سے تقریباً پانچ سال قبل فلم ”ہندی میڈیم“ سے بالی وڈ میں قدم رکھا جہاں انہیں عرفان خان کے ساتھ کام کرنے کا موقع میسر آیا۔ اس کے بعد اداکارہ نے کسی بھارتی فلم میں اداکاری نہیں کی۔
صبا قمر نے ”پنک ولا“ کو انٹرویو میں عرفان خان کے ساتھ فلم سیٹ پر ہونے والے تجربے پر کھل کر بات کی اور ان کی موقت سے پہلے رابطے میں نہ رہنے پر افسوس کا اظہار بھی کیا۔
عرفان خان اور صبا قمر کی فلم ”ہندی میڈیم“ مئی 2017 میں ریلیز ہوئی تھی جس نے اچھا بزنس کیا تھا، لیکن اس کے عرفان خان کینسر کے مرض میں مبتلا ہوگئے تھے۔ بیماری کے باعث عرفان خان 29 اپریل 2020 کو 53 سال کی عمر میں انتقال کر گئے تھے۔
انٹرویو میں صبا قمر نے کہا کہ عرفان خان کی موت کی خبر سے شدید صدمہ پہنچا، مجھے اس بات کا افسوس ہے، فلم کے بعد جب عرفان کی طبیعت خراب ہوئی تو میں نے ان سے رابطہ کرنے کا ارادہ کیا لیکن شوٹنگ اور سفر میں مصروف رہنے کے باعث میں ایسا نہیں کر سکی، پھر ایک دن میں نے ان کی موت کے بارے میں سنا جس سے شدید صدمہ پہنچا، اس وقت مجھے احساس ہوا کہ جو وقت دستیاب ہو اس سے فائدہ اٹھانا چاہیے کیوں کہ وقت کبھی پلٹ کر نہیں آتا۔
اداکارہ نے لوگوں کو مشورہ دیتے ہوئے انٹرویو میں کہا کہ اگر آپ کسی سے معافی مانگنا چاہتے ہیں یا اپنی محبت کا اظہار کرنا چاہتے ہیں تو فوراً سے کر دیں کیوں کہ پھر شاہد یہ لمحہ میسر نہ آسکے، مجھے یہی افسوس ہے کہ کاش میں عرفان خان سے اس وقت رابطہ کر لیتی اور ہماری کچھ باتیں ہو جاتیں۔
صبا قمر نے عرفان خان کے ساتھ کام کے دوران کچھ دلکش یادیں کے بارے میں بھی بات کی۔ انہوں نے کہا کہ وہ ایک بہترین اداکار تھے، مجھے ان کے ساتھ کام کر کے مزہ آیا، میں نے ان سے بہت کچھ سیکھا۔
صبا قمر بالی وڈ میں بڑے عرصے بعد واپسی کے لیے ”زندگی“ اور ”زی فائیو“ کی ویب سیریز پر کام کر رہی ہیں۔
