کراچی : وزیراعظم شاہد خاقان عباسی امریکی اسکول میں فائرنگ سے جاں بحق ہونے والی طالبہ سبیکا شیخ کے گھرپہنچے اور متوفی طالبہ کے اہل خانہ سے اظہار تعزیت کیا۔
تفصیلات کے مطابق وزیر اعظم شاھد خاقان عباسی کراچی آمد کے فوری بعد امریکہ میں ایک اسکول میں فائرنگ کے واقعے میں جاں بحق ہونے والی طالبہ سبیکا شیخ کے گھر پہنچے ان کے ہمراہ گورنر سندھ محمد زبیر بھی موجود تھے۔
وزیراعظم شاہد خاقان نے سبیکا کے اہل خانہ سے ملاقات کی اور سانحہ پر تعزیت کا اظہار کیا، وزیر اعظم نے کہا کہ ہونہار طالبہ سبیکا کی موت پر پوری قوم سوگوار ہے، اللہ تعالیٰ سبیکا کے اہل خانہ کو صبر جمیل عطا فرمائے۔
شاہد خاقان عباسی کا مزید کہنا تھا کہ انتہا پسندانہ رجحانات کسی ایک ملک یاخطے کا نہیں بلکہ عالمی مسئلہ ہے ،ایسے رجحانات کےاسباب کے تدارک کی ضرورت ہے، عالمی سطح پر تجربات سے استفادہ کرنے کی بھی ضرورت ہے۔
خیال رہے کہ دو روز قبل امریکی ریاست ٹیکساس میں شہرہوسٹن کے سانٹا فے ہائی اسکول میں طالبعلم کی فائرنگ سے پاکستانی طالبہ سبیکا شیخ سمیت 10 طالبعلم جاں بحق ہوگئے تھے۔
مزید پڑھیں: امریکا، اسکول میں فائرنگ 10 افراد ہلاک، حملہ آور گرفتار
گلشن اقبال کراچی کی رہائشی 17سالہ سبیکا شیخ سانتافے ٹیکساس میں ایکسچینج ایئر پروگرام کی طالبہ تھی، وہ 21 اگست 2017 کو یوتھ ایکسچیج اینڈ اسٹڈی پروگرام کے تحت تعلیم حاصل کرنے امریکا گئی تھی۔
خبر کے بارے میں اپنی رائے کا اظہار کمنٹس میں کریں‘مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔
