حلقہ این اے 162 : ضمنی الیکشن میں نواز لیگ نے پی ٹی آئی کو ہرا دیا -
The news is by your side.

Advertisement

حلقہ این اے 162 : ضمنی الیکشن میں نواز لیگ نے پی ٹی آئی کو ہرا دیا

چیچہ وطنی : ساہیوال کی تحصیل چیچہ وطنی کے حلقہ این اے 162 کے ضمنی الیکشن میں غیر حتمی اور غیرسرکاری نتائج کے مطابق ن لیگ کے چوہدری طفیل جٹ نے تحریک انصاف کے امیدوار کو ہرا کر میدان مار لیا, تحریک انصاف کے امیدوار دوسرے نمبر پر رہے۔

تفصیلات کےمطابق مسلم لیگ ن نے این اے 162 میں ضمنی ایکشن کا معرکہ سرکر لیا ہے۔ حلقے کے تمام 293 پولنگ اسٹیشنوں کے غیرحتمی اورغیر سرکاری نتائج کے مطابق ن لیگ کے امیدوار طفیل جٹ نے 68945 ووٹ حاصل کر کے کامیابی اپنے نام کی۔

پی ٹی آئی کے امیدوار رائے مرتضیٰ اقبال 64614 ووٹ لے کر دوسرے نمبر پر رہے، جبکہ پیپلز پارٹی کے شہزاد چیمہ نے 15343 ووٹ حاصل کئے۔

صبح سے ہی ضمنی الیکشن کے لیے پولنگ کا عمل پُر امن طریقے سے جاری رہا اور مقررہ وقت تک لوگ اپنا حق رائے دہی استعمال کرتے رہے تا ہم ووٹ کا ٹرن آؤٹ معمول سے کم رہا۔

پولنگ کے دوران کوئی بھی ناخوشگوار واقعہ دیکھنے میں نہیں آیا۔ اس حلقےمیں ن لیگ کےچوہدری محمد طفیل جٹ، پیپلزپارٹی کے شہزاد سعید چیمہ اور تحریک انصاف کے رائے محمد مرتضیٰ اقبال کے درمیان مقابلہ تھا۔

ن لیگ کی شاندار فتح پر شیر کے متوالوں نے خوب جشن منایا۔ مٹھائیاں تقسیم کی گئیں اور بھنگڑے بھی ڈالے، کارکنان نے خوشی میں ہوائی فائرنگ بھی اور نعرے بازی بھی کی۔

اسی سے متعلق: چیچہ وطنی،ضمنی الیکشن کے لیے پولنگ ختم،گنتی کا عمل شروع

حلقہ این اے 162چیچہ وطنی شہر ،کسوال اور ہڑپہ کی دیہی آبادی پر مشتمل ہے جہاں رجسٹرڈ ووٹرز کی تعداد تین لاکھ چھ ہزار ہے۔ جن میں سے ایک لاکھ 74 ہزار مرد اور ایک لاکھ بتیس ہزار خواتین ووٹرز ہیں۔

اس حلقے میں کل 293 پولنگ اسٹشینز بنائے گئے تھے ان میں سے 22 کوحساس ترین قرار دیا گیا اور کسی بھی ناخوشگوار واقعے سے نمٹنے کے لیے حلقے میں پولیس کے ساتھ پاک فوج نے بھی پولنگ اسٹیشنز کے اندر اور باہر سیکورٹی کے فرائض سرانجام دیئے۔

 

Comments

comments

یہ بھی پڑھیں