لاہور: پی سی بی نے انجری کا شکار ابرار احمد کی جگہ آف اسپنر ساجد خان کو آسٹریلیا بھیجنے کا فیصلہ کرلیا ہے۔
اے آر وائی نیوز کے مطابق ذرائع کا کہنا ہے کہ آف اسپنر ساجد خان کو آسٹریلیا بھیجنے کا فیصلہ کیا گیا ہے، ساجد خان کو ابرار احمد کے ان فٹ ہونے پر بھیجا جارہا ہے۔
ٹیم مینجمنٹ کی مشاورت کے ساتھ سلیکشن کمیٹی نے ساجد خان کے نام پر اتفاق کیا ہے۔ سفری دستاویزات مکمل ہوتے ہی پہلی دستیاب پرواز سے ساجد خان پرتھ روانہ ہونگے.ساجد خان کو آسٹریلوی ٹیم میں بائیں ہاتھ کے بیٹرز زیادہ ہونے کی بنا پر ترجیح دی جارہی ہے۔
ساجد خان اب تک سات ٹیسٹ میں 22 شکار کرچکے ہیں.آف اسپنر نے گزشتہ برس مارچ میں آسٹریلیا کے خلاف ہی اپنا آخری ٹیسٹ کھیلا تھا۔
واضح رہے کہ پاکستان کرکٹ ٹیم اور آسٹریلیا کی پرائم منسٹر الیون کے درمیان کینبرا میں چار روزہ میچ کے تیسرے دن پاؤں میں تکلیف کے باعث ابرار احمد نے صرف 8 اوورز کروائے تھے اور انہیں میدان سے باہر جانا پڑا تھا۔
پاکستان کرکٹ ٹیم آسٹریلیا کے خلاف 14 دسمبر سے ٹیسٹ سیریز کھیلے گی۔
تین میچوں کی سیریز کا پہلا ٹیسٹ پرتھ میں کھیلا جائے گا جبکہ دوسرا ٹیسٹ 26 دسمبر سے میلبرن اور سیریز کا تیسرا اور آخری ٹیسٹ میچ 3 جنوری کو سڈنی میں کھیلا جائے گا۔
