لاہور : عدالت نے پی ٹی آئی کے مرکزی رہنما اور آزاد امیدوار سلمان اکرم راجہ کی انتخابی نتائج کیخلاف درخواست مسترد کردی۔
تفصیلات کے مطابق لاہورہائیکورٹ میں تحریک انصاف کے وکیل سلمان اکرم راجہ نے اپنے حلقے میں کی جانے والی مبینہ دھاندلی سے متعلق درخواست دائر کی تھی۔
درخواست کی سماعت کے موقع پر لاہورہائیکورٹ کے جج نے سلمان اکرم راجہ کو اس سلسلے میں الیکشن کمیشن سے رجوع کرنے کی ہدایت کی۔
اس کے علاوہ ن لیگ کے رہنماؤں مریم نواز، خواجہ آصف، عطا تارڑ اور آئی پی پی کے رہنما علیم خان کی کامیابی کیخلاف درخواستیں بھی مسترد کردیں۔
اپنے ریمارکس میں معزز جج کا کہنا تھا کہ مذکورہ درخواستیں مسترد کرنے کی وجوہات تحریری فیصلے میں دی جائیں گی۔
واضح رہے کہ آج سندھ ہائیکورٹ نے صوبے میں انتخابی نتائج کے خلاف تمام درخواستوں کی فوری سماعت کی درخواست منظور کرلی۔
مختلف سیاسی جماعتوں کے امیدواروں کی جانب سے مخالف امیدوار کی جیت کے نتائج کو عدالت میں چیلنج کیا گیا ہے۔
متحدہ قومی موومنٹ (ایم کیو ایم) پاکستان کے رہنماؤں فاروق ستار اور مصطفیٰ کمال کی کامیابی کو سندھ ہائیکورٹ میں چیلنج کر دیا گیا۔ پی ٹی آئی کے اُمیدوار نے کراچی سے قومی اور صوبائی اسمبلی کے 19حلقوں کے نتائج کو چینلج کیا ہے۔
