ملتان ٹیسٹ کے میچ تیسرے روز سلمان علی آغا اور نعمان علی کی گفتگو کی ویڈیو سوشل میڈیا پر وائرل ہوگئی۔
سوشل میڈیا پر ایک ویڈیو تیزی سے وائرل ہورہی ہے جس میں دیکھا جاسکتا ہے کہ سلمان علی آغا 25 اور اسپنر نعمان علی 0 پر بیٹنگ کررہے ہیں۔
نعمان علی انگلش کپتان بین اسٹوکس کی گیند پر لیگ سائیڈ پر شاٹ کھیلتے ہیں اور ایک رن بنالیتے ہیں۔
سلمان علی آغا بیٹنگ ایںڈ پر پہنچتے ہی نعمان علی کو آواز دے کر مزاحیہ انداز میں کہتے ہیں کہ ’اوہ، یہ شاٹ خود ہی ماری ہے۔‘
نعمان علی جواب دیتے ہیں کہ ’ہاں ہاں، دیکھا نہیں تیرے بھائی نے پورا برائن لارا والا شاٹ کھیلا ہے۔‘
واضح رہے کہ سلمان علی آغا نے انڈر پریشر 63 رنز کی شاندار اننگز کھیلی جبکہ نعمان علی ایک رن بنا کر پویلین لوٹ گئے تھے۔
ملتان ٹیسٹ میں پاکستان کی پوزیشن مضبوط ہوگئی اور جیت کے لیے انگلینڈ کی 8 وکٹیں درکار ہیں۔
تیسرے روز کا کھیل ختم ہوگیا، پاکستان نے انگلینڈ کو جیت کے لیے 297 رنز کا ہدف دیا جواب میں مہمان ٹیم نے دو وکٹوں کے نقصان پر 36 رنز بنالیے ہیں۔
زیک کرولی تین ، بین ڈکٹ بغیر کوئی رن بنائے پویلین لوٹ گئے۔ انگلینڈ کی دو وکٹیں 11 رنز پر گریں، ساجد خان اور نعمان علی نے ایک، ایک وکٹ حاصل کی۔
اس سے قبل قومی ٹیم دوسری اننگز میں 221 رنز بنا کر آل آؤٹ ہوئی تھی، سلمان علی آغا نے دباؤ میں شاندار نصف سنچری اسکور کی اور ساجد خان کے ساتھ نویں وکٹ پر 65 رنز جوڑے۔
سعود شکیل 31، کامران غلام 26، محمد رضوان 23 رنز بنا کر پویلین لوٹ گئے۔صائم ایوب 22 رنز بنا کر آؤٹ ہوئے، کپتان شان مسعود نے 11 اور عبداللہ شفیق نے 4 رنز بنائے۔
انگلش اسپنر شعیب بشیر نے چار وکٹیں حاصل کیں، جیک لیچ نے بھی تین کھلاڑیوں کو پویلین کی راہ دکھائی۔
