کراچی : پاکستانی فلم، تھیٹر اور ٹیلی وژن معروف اداکار سلمان شاہد نے بتایا ہے کہ کس طرح ان کو بھارتی فلم میں کام کرنے کی پیشکش ہوئی۔
پاکستان ٹی وی کے معروف اداکارسلمان شاہد نے بتایا ہے کہ وہ کس طرح شوبز کی فیلڈ میں آئے اور ان کا ٹیلی وژن سے تعلق کس طرح شروع ہوا۔
ٹیلی ویژن پر شوخ اور سنجیدہ کرداروں کے لحاظ سے اداکار سلمان شاہد شعبہ اداکاری میں ایک منفرد مقام رکھتے ہیں، ان کی بے ساختہ اور برجستہ اداکاری نے ٹی وی ڈراموں کو سپرہٹ بنانے میں اہم کردار ادا کیا۔
ٹی وی ڈراموں میں اداکاری کے جوہر دکھا نے والے معروف اور سینئر اداکار سلمان شاہد اور ان کی اہلیہ طاہرہ سلمان نے اے آر وائی ڈیجیٹل کے پروگرام گڈ مارننگ پاکستان میں شرکت کی اور اپنی زندگی میں پیش آنے والے حالات و واقعات سے ناظرین کو آگاہ کیا۔
بھارتی فلم میں نصیرالدین شاہ کے ساتھ کام کرنے کے حوالے سے ایک سوال کے جواب میں انہوں نے بتایا کہ مجھے خود نہیں معلوم کہ یہ آفر کیسے ہوئی حالانکہ مجھ سے زیادہ مشہور اور قابل اداکار موجود تھے بہرحال اس لیے میں خود کو بہت خوش قسمت تصور کرتا ہوں۔
انہوں نے کہا کہ میں بچپن میں اپنی امی سے ساتھ تھیٹر جایا کرتا تھا، اس لیے شروع سے ہی اداکاری کا شوق پروان چڑھا اور اداکاری کی ابتدا بھی تھیٹر سے ہی کی تھی۔
