اسلام آباد میں 17 سالہ نوجوان ٹک ٹاکر ثنا یوسف کے اندوہناک قتل نے ہر کسی کو افسردہ کردیا ہے، سوشل میڈیا صارفین کے ساتھ ساتھ شوبز کے معروف ستارے بھی قاتل کو سخت سزا دینے کا مطالبہ کررہے ہیں۔
فوٹو اینڈ ویڈیو شیئرنگ ایپ پر اداکارہ ماورا حسین نے لکھا کہ یہ ایک اور کہانی ہے جسے ہم چند دنوں میں بھول جائیں گے۔ ہم بحیثیت ایک معاشرہ اور انسان ناکام ہوچکے ہیں اور مجھے یہاں سے واپسی کا کوئی راستہ نظر نہیں آتا۔
انہوں نے اپنی پوسٹ میں لکھا کہ 17 سال کی لڑکی صرف اس لیے قتل کردی گئی کیوں کہ ایک لڑکے کی سوچ یہ ہے کہ مسترد ہونے پر یہ کرنا ٹھیک ہے۔ ساتھ ہی انہوں نے امید ظاہر کی کہ حکام اس مجرم کو ایک مثال بنادیں گے۔
ماہرہ خان کا دکھ کا اظہار کرتے ہوئے کہنا تھا کہ اگر ہم نے اس مجرم کو انجام تک نا پہنچایا تو یہ سلسلہ نہیں رکے گا، اس کا چہرہ سامنے لائیں اور اسے ایک مثال بنائیں۔
If we do not take this to task this will not stop!! Show his face – make an example out of him!! @GovtofPakistan https://t.co/LpbzEXJeAc
— Mahira Khan (@TheMahiraKhan) June 3, 2025
عمران عباس کا کہنا تھا کہ 17 سالہ لڑکی کے قتل کی خبر سن کر مجھے بہت صدمہ پہنچا ہے، حکومت کو ایسے خوفناک جرائم پر فوری کارروائی کرنے کی ضرورت ہے، بالخصوص جو غیرت اور دیگر بہانوں سے لڑکیوں کے خلاف کیے جائیں انہوں نے کہا کہ گزشتہ چند ماہ میں یہ پانچواں ایسا واقعہ ہے۔
دانیہ انور کا کہنا تھا کہ ثنا بہت چھوٹی بچی تھی صرف 17 سال کی تھی، میں بالکل گنگ ہوں اور ابھی تک سمجھنے کی کوشش کر رہی ہوں۔ انہوں نے کہا کہ میری بیٹی بھی 17 سال کی ہے۔ یہ دنیا کس طرف جا رہی ہے؟ ہم تو پیچھے کی طرف جا رہے ہیں۔
واضح رہے کہ ثنا یوسف کے قتل کیس میں پولیس نے مرکزی ملزم کو گرفتار کرلیا گیا، قاتل کا تعلق پنجاب سے ہے۔
پولیس نے ملزم کے قبضے سے آلہ قتل پستول بھی برآمد کرلیا ہے۔
ملزم نے ثنا یوسف کے قتل کا اعتراف کرلیا
یاد رہے وفاقی دارالحکومت اسلام آباد میں نوجوان نے ٹک ٹاکر خاتون کو گولیاں مار کر قتل کر دیا تھا۔ابتدائی اطلاعات کے مطابق واقعہ تھانہ سنبل کی حدود میں پیش آیا، ٹک ٹاکر کا تعلق چترال سے ہے۔
