نئی دہلی: بھارتی ٹینس اسٹار اور قومی کرکٹ ٹیم کے سابق کپتان شعیب ملک کی اہلیہ ثانیہ مرزا نے اپیل کی ہے کہ جو لوگ پہلے ہی عطیات دے چکے وہ ضرورت مندوں کی مزید مدد کریں۔
سماجی رابطے کی ویب سائٹ پر ثانیہ مرزا نے اپنے ایک ٹویٹ میں کہا کہ ’ہم جیسے لوگوں کے لیے یہ لاک ڈاؤن صرف دو ہفتوں کا ہے مگر بیشتر لوگ ایسے ہیں جن کے لیے یہ صرف دو ہفتوں تک محدود نہیں کیونکہ اس دوران اُن کے پاس نہ کھانا ہے اور نہ ہی کمانے کا کوئی ذریعہ ہے‘۔
ثانیہ مرزا نے اپیل کی کہ اگر لوگ پہلے سے عطیات دے چکے ہیں تب بھی انہیں چاہیے کہ وہ پسماندہ لوگوں کی مزید مدد کریں کیونکہ اس وقت دنیا کو رحم دلی کی ضرورت ہے۔
For some of us it might be just two more weeks of lockdown but for a lot of ppl this isn’t going to be ‘just two weeks’.it means no food for 2 weeks and no means of earning it.pls spare a thought and donate whatever u can even if u have already donated.the world needs kindness❤️
— Sania Mirza (@MirzaSania) May 2, 2020
یاد رہے کہ بھارتی حکومت نے گزشتہ روز لاک ڈاؤن میں مزید دو ہفتوں کی توسیع کا اعلان کیا ہے، یعنی چار مئی کے بعد اب لاک ڈاؤن کی تاریخ 18 مئی تک بڑھا دی گئی ہے۔
مزید پڑھیں: ’کھانے کی تصاویر شیئر کرنے سے پہلے اُن لوگوں کا سوچیں جو بھوک سے مررہے ہیں‘
ثانیہ مرزا نے اس سے قبل بھی لاک ڈاؤن کے دوران کھانے کی تصاویر اور ویڈیوز شیئر کرنے والے صارفین کو شدید تنقید کا نشانہ بناتے ہوئے کہا تھا کہ ’’کیا ہم کھانا پکانے کی ویڈیوز اور تصاویر سوشل میڈیا پر شیئر نہیں کرچکے؟، زرا سوچیے کہ اس وقت دنیا میں ہزاروں ایسے لوگ ہمارے اردگرد بھی موجود ہیں جو ان دنوں بہت سی مشکلات کا سامنا کررہے ہیں اور اُن کے پاس کھانے کے لیے کچھ بھی نہیں ہے‘۔