بھارت کی معروف ٹینس اسٹار ثانیہ مرزا کے والد عمران مرزا نے اپنی بیٹی کے اسکول کی یادوں کو زندہ کردیا، انہوں نے بیٹی کی اسکول پرنسپل کے ساتھ ایک یادگار تصویر سوشل میڈیا پر شیئر کی ہے۔
عمران مرزا نے فوٹو اینڈ ویڈیو شیئرنگ ایپ انسٹاگرام پر ثانیہ مرزا کی اسکول پرنسپل کے ساتھ ایک یاد گار تصویر شیئر کردی ہے جس میں ثانیہ مرزا اپنی پرنسپل اور والدین کے ساتھ موجود ہیں۔
انہوں نے تصویر شیئر کرتے ہوئے لکھا کہ2003 میں ثانیہ کے ومبلڈن گرلز ڈبلز ٹرافی جیتنے کے بعد نصر اسکول کی پرنسپل بیگم انیس خان کے ساتھ مرزا خاندان کی یادیں۔
خیال رہے کہ ثانیہ مرزا نے اپنی ابتدائی تعلیم بھارت کے شہر حیدرآباد دکن میں نصر اسکول سے حاصل کی اور وہ ٹینس میں اپنی کامیابی کا کریڈٹ اپنے اسکول کو دیتی ہیں۔
ایک انٹریو میں ثانیہ مرزا نے کہا تھا کہ نصر اسکول وہ جگہ ہے جس نے انہیں بھارت کی نمبر ون ٹینس پلیئر بننے کے خواب کو پورا کرنے کی آزادی دی۔
واضح رہے کہ ٹینس اسٹار ثانیہ مرزا کی یہ یادگار تصویر سوشل میڈیا کے مختلف پیجز پر بھی بہت وائرل ہورہی ہے اور صارفین کی جانب سے اسے بہت پسند بھی کیا جارہا ہے۔
