کراچی: سانحہ بلدیہ کی تفتیش میں اہم موڑ سامنے آگیا، گرفتار ملزم زبیر عرف لالہ نے انکشاف کیا ہے کہ آگ جنرل منیجر نے لگوائی اور اسی کے حکم پر دروازے بند کیے گئے۔
اطلاعات کے مطابق انسداد دہشت گردی کی عدالت میں سانحہ بلدیہ کیس کی سماعت ہوئی جس میں گرفتار ملزم زبیر عرف لالہ کو پیش کیا گیا۔
ملزم زبیر عرف لالہ نے عدالت میں انکشاف کیا کہ فیکٹری کے جنرل منیجر منصور اور شاہ رخ نے فیکٹری میں آگ لگائی، ان ہی کے کہنے پر فیکٹری کے دروازے بند کیے گئے ،میرے سامنے لوگ جھلس کر مر گئے۔
عدالت نے حماد صدیقی رحمان عرف بھولا کی عدم گرفتاری پر اظہار برہمی کرتے ہوئے وزارت داخلہ کو حکم دیا کہ انہیں انٹرپول کی مدد سے گرفتار کیا جائے۔
عدالت نے ریمارکس دیے کہ مقدمہ جان بوجھ کر خراب کیا جارہا ہے۔
دریں اثنا عدالت نے متاثرین کی فریق بننے کی درخواست مسترد کرتے ہوئے سماعت 19 دسمبر تک ملتوی کردی۔
