ممبئی: بھارتی اداکارہ سنجیدہ شیخ نے بہت زیادہ خوبصورت ہونے کی وجہ سے فلم انڈسٹری میں درپیش مشکلات کے بارے میں بتا دیا۔
سنجیدہ شیخ کو حال ہی میں نامور فلمساز سنجے لیلا بھنسالی کی نیٹ فلکس پر ریلیز ویب سیریز ’ہیرا منڈی‘ میں دیکھا گیا جہاں انہوں نے ’وحیدہ‘ نامی خاتون کا کردار ادا کیا ہے۔
وہ اس وقت ’ہیرا منڈی‘ کی کامیابی سے لطف اندوز ہو رہی ہیں اور حال ہی میں انہوں نے متعدد انٹرویوز بھی دیے۔ ایک انٹرویو میں انہوں نے بہت زیادہ خوبصورت ہونے کی وجہ سے درپش مشکلات کے بارے میں کھل کر بات کی۔
انٹرویو میں سنجیدہ شیخ سے پوچھا گیا کہ کیا کبھی خوبصورتی کی وجہ سے آپ نے خود کو غیر محفوظ محسوس کیا تو اس پر اداکارہ کا جواب حیران کر دینے والا تھا۔
’وحیدہ‘ نے جواب دیا کہ زندگی میں ایسے مواقع بھی آئے جب میں نے اپنی خوبصورتی کی وجہ سے خود کو غیر محفوظ سمجھا، یہ اُس وقت ہوا جب مجھے اہم کرداروں سے ہاتھ دھونا پڑا۔
انہوں نے بتایا کہ مجھے کہا جاتا تھا کہ آپ بہت زیادہ حسین ہیں لہٰذا آپ کو مخصوص کرداروں کیلیے کاسٹ نہیں کیا جا سکتا۔
سنجیدہ شیخ نے ٹیلی ویژن سے اپنا کیریئر شروع کیا تھا اور بعد میں انہیں متعدد فلموں میں اداکاری کے جوہر دکھانے کا موقع ملا۔ انہیں سنجے لیلا بھنسالی کی ’ہیرا منڈی‘ سے کافی شہرت ملی ہے۔
