پاکستان کرکٹ ٹیم کے سابق ہیڈ کوچ ثقلین مشتاق قومی ٹیم کے اوپنر امام الحق کے وائرل کلپ کے بعد ان کے حق میں سامنے آئیں ہیں۔
امام الحق کے پوڈ کاسٹ کے کچھ کلپس سماجی رابطوں کی ویب سائٹس پر وائرل ہوئے تو جہاں صارفین نے امام الحق کو اس قسم کے نعروں پر دھیان نہ دینے کا مشورہ دیا، وہیں سابق ہیڈ کوچ ثقلین مشتاق بھی ان کے حق میں سامنے آگئے۔
ثقلین مشتاق نے سوشل میڈیا پلیٹ فارم ایکس پر پوسٹ شیئر کرتے ہوئے لکھا کہ ون ڈے رینکنگ میں آپ کی چوتھی پوزیشن بہت بڑی کامیابی ہے۔
کرکٹ ٹیم کے سابق ہیڈ کوچ کا کہنا تھا کہ قوم کو آپ پر فخر ہے اور مجھے یقین ہے کہ آپ کے والدین کو بھی آپ پر بہت فخر ہوگا کہ آپ محنت اور لگن سے تمام تر چیلنجز کا مقابلہ کررہے ہیں۔
امام الحق کس ڈر سے والدین کو اسٹیڈیم نہیں لاتے؟
انہوں نے مزید لکھا کہ مجھے یقین ہے کہ آپ کے والدین کو آپ کو براہ راست کھیلتے ہوئے دیکھ کر انہیں بے حد خوشی ہوگی۔
واضح رہے کہ امام الحق پاکستان کرکٹ ٹیم کے سابق کپتان اور چیف سلیکٹر انضمام الحق کے بھتیجے ہیں۔
Dear @ImamUlHaq12 your position 4th in the ODI ranking such a great achievement. Nation is proud of you & I am sure your parents must be the proudest with your dedication and hard work and overcoming challenges I believe it would be a delight for them to see you play live pic.twitter.com/1jORbS5VN0
— Saqlain Mushtaq (@Saqlain_Mushtaq) August 21, 2023
جس وقت انہوں نے کرکٹ کریئر کے آغاز کیا اس وقت ان کے چچا پی سی بی کے عہدے پر فائز تھے، جس کے بعد ان پر اپنے چچا کی وجہ سے ’پرچی‘ کی چھاپ لگ گئی تھی اور کھلاڑی کو عوام کی جانب سے شدید تنقید کا سامنا کرنا پڑا تھا۔
خیال رہے کہ حال ہی میں امام الحق کا ایک کلپ سوشل میڈیا پر خوب وائرل ہے جس میں انہوں نے اپنے میچوں کے دوران والدین کی اسٹیڈیم سے غیر حاضری کی وجوہات بیان کی اور کہا کہ انہیں اپنی خراب کارکردگی کا خوف نہیں ہے بلکہ اسٹیڈیم میں بیٹھے تماشائیوں کا ہے کہ کہیں وہ والدین کے سامنے مجھے پرچی نہ کہہ دیں کیونکہ اگر ایسا ہوا تو مجھے بہت افسوس ہوگا، اسی وجہ سے آج تک والدین کو گراؤنڈ میچ دکھانے نہیں لایا۔