لاہور: سرعام کی ٹیم ان دنوں جشنِ آزادی کے سلسلے میں 14 لاکھ پودے لگانے کے مشن پر ہے، اس سلسلے میں لاہور میں 71 سیکنڈ میں 71 پودے لگا کر نیا ریکارڈ بھی قائم کردیا۔
تفصیلات کے مطابق سرعام کی ٹیم نے لاہور میں پاک ترک اسکول کے طلبہ کے ساتھ مل کر پاکستان کے 71 ویں جشنِ آزادی کے موقع پر 71 سیکنڈ میں 71 پودے لگائے ٹیم کے زیرِ اہتمام ملک کے طول و عرض میں شجر کاری مہم جاری ہے۔
پاکستان کی آزادی کے 71 سال۔۔۔ لاہور میں پاک تُرک اسکول کے بچوں نے 71 سیکنڈز میں 71 پودے لگائے۔۔۔ شاباش بچو !! ہمیں یقین ہے آپ کی بدولت ہمارا مستقبل شاندار ہے۔ آپ بھی ان بچوں کے مستقبل کے لئے کم سے کم ایک درخت ضرور لگائیے۔#سبزپاکستان #شکریہ_پاکستان pic.twitter.com/Ij1Z1LnO7h
— Iqrar ul Hassan Syed (@iqrarulhassan) August 9, 2018
اے آروائی نیوز کے مشہورِ زمانہ ٹی وی شو’سرعام‘ کے میزبان اقرار الحسن کا کہنا ہے کہ ہمیں صرف پودے نہیں لگانے بلکہ ان کی حفاظت بھی کرنی ہے، گزشتہ روز اس سلسلے میں انہوں نے طلبہ و طالبات ، سول سوسائٹی اور وکلا کے ساتھ مل کر شجر کاری کی تھی۔
ٹیم سرِ عام کے رضاکار اس سلسلے میں ملک بھر میں سرگرم ہیں، اور ان کی جانب سے شجر کاری کرکے تصاویر مسلسل سوشل میڈیا پر شیئر کی جارہی ہیں جس سے دیگر افراد کو بھی تحریک مل رہی ہے۔
سر عام کی اس مہم میں مشہور و معروف اداکار اور کرکٹر بھی شامل ہیں۔ سابق کرکٹر محسن خان اور بوم بوم شاہد آفریدی بھی اس مہم میں پیش پیش رہے اور اقرار الحسن کے ہمراہ درخت لگائے۔
پاکستان سے محبت کی بات ہو اور شاہد آفریدی کسی سے پیچھے رہ جائیں، ہو ہی نہیں سکتا۔ پاکستان کی شان شاہد آفریدی نے سرِعام کی ٹیم کی شجر کاری مہم کو سپورٹ کرتےہوئے اپنے گھر کے باہر اپنی بیٹیوں اور بھتیجوں کے ہمراہ ایک پودے کا گملا نصب کیا۔ شکریہ لالا @SAfridiOfficial #شکریہ_پاکستان pic.twitter.com/85tRLKCjNO
— Iqrar ul Hassan Syed (@iqrarulhassan) August 9, 2018
دیگر اہم شخصیات میں نوید رضا، شان بیگ، کنور نفیس، ٹیپو شریف، اور معروف ٹی وی اینکر فرح یوسف سمیت تمام شعبہ ہائے زندگی سے تعلق رکھنے والے افراد اس مہم میں بھرپور حصہ لے رہے ہیں۔
یاد رہے کہ اس وقت پوری دنیا ماحولیاتی تبدیلیوں کا سامنا کررہی ہے اور اس کے سبب دنیا بھر میں بارشوں ، برف باری اور گرمی کے نظام الاوقات تبدیل ہوکر رہ گئے ہیں۔ پاکستان میں بھی ان تبدیلیوں سے متاثر ہونے والے ممالک میں شامل ہے۔ سنہ 2015 میں پیرس میں ہونے والے عالمی معاہدے کا پاکستان بھی دستخط کنندہ ہے جس کے تحت دنیا کے 195 ممالک ماحولیاتی تبدیلیوں کو روکنے کے لیے اقدامات کریں گے جن میں شجر کاری کو اولین ترجیح حاصل ہے۔
