کوئٹہ : سردار اختر مینگل نے موجودہ ‘کئیر ٹیکر’ حکومت کو ‘انڈر ٹیکر’ قرار دیتے ہوئے کہا کہ بلوچستان کا کوئی حصہ اس وقت محفوظ نہیں، طاقتور حلقوں کے سامنے چیف جسٹس بھی بے بس ہے۔
تفصیلات کے مطابق بلوچستان نیشنل پارٹی کے سربراہ سردار اختر مینگل کوئٹہ میں شمولیتی پروگرام میں شریک ہوئے، جس میں سینئر ایڈووکیٹ ابراہیم لہڑی اور دیگر نے بی این پی میں شمولیت کا اعلان کیا۔
اس موقع پر سردار اختر مینگل کا کہنا تھا کہ پارٹی میں شمولیت کرنیوالوں کو خوش آمدید کہتا ہوں، صوبے کی سیاست میں پڑھے لکھے لوگوں کی ضرورت ہے۔
انہوں نے کہا کہ نگراں حکومت کے حوالے سے کہہ چکا تھا کہ یہ کئیر ٹیکر نہیں بلکہ انڈر ٹیکر حکومت ہوگی کیونکہ بلوچستان میں آج بھی حالات نہیں بدلے، صوبے کے کسی علاقے میں امن و امان کی صورتحال بہتر نہیں ہے۔
سردار اختر مینگل نے مزید کہا کہ ہم نے ہمیشہ لاپتہ افراد کی بات کی ہےم اسی موقف کی وجہ سے ہمیشہ ہمیں نقصان اٹھانا پڑا ہے، پی ٹی آئی حکومت کیساتھ بھی ہمارا مسئلہ لاپتہ افراد کے ایشو پر بنا، ملک کے طاقتور حلقوں کے سامنے چیف جسٹس آف پاکستان بھی کچھ نہیں کر سکتے۔
