ریاض: سعودی عرب میں قانون کی خلاف ورزی پر ایک ہفتے میں 25 ہزار افراد کو گرفتار کیا گیا۔
سعودی وزارت داخلہ کے مطابق سعودی عرب کے تمام خطوں میں ایک مشترکہ فیلڈ مہم چلائی گئی، جس میں قواعد و ضوابط کی خلاف ورزی کرنے پر ایک ہفتے کے دوران 25150 کو حراست میں لیا گیا۔
وزارت نے انکشاف کیا کہ ان سب کو 13 سے لے کر 19 مارچ 2025 کے درمیان حراست میں لیا گیا۔
گرفتار کیے گئے لوگوں میں ریزیڈنسی سسٹم کی خلاف ورزی کرنے والے 17,886، بارڈر سیکیورٹی سسٹم کی خلاف ورزی کرنے والے 4,247 اور لیبر سسٹم کی خلاف ورزی کرنے والے 3,017 افراد شامل ہیں۔
مملکت میں غیر قانونی طور پر سرحد عبور کرنے کی کوشش کے دوران گرفتار ہونے والوں کی کل تعداد 1,553 تک پہنچ گئی ہے، ان میں سے 28 فی صد یمنی، 69 فی صد ایتھوپین اور 3 فی صد دیگر قومیتوں کے لوگ تھے۔
عمرہ زائرین کی بس کو تصادم کے بعد آگ لگ گئی، خوفناک حادثہ
رہائش، کام اور سرحدی سلامتی کے ضوابط کی خلاف ورزی کرنے والوں کو نقل و حمل، پناہ دینے، ملازمت دینے اور ان کی پردہ پوشی کرنے والے 36 افراد کو بھی حراست میں لے لیا گیا ہے۔ دوسری طرف قواعد و ضوابط کی خلاف ورزی کرنے پر پکڑے گئے غیر ملکیوں کی تعداد 38061 تک پہنچ گئی ہے، ان میں 2266 خواتین بھی شامل ہیں۔
