ریاض: سعودی عرب میں ایئر پورٹ فیس میں 35 فیصد کمی کا ارادہ کیا جارہا ہے تاکہ سیاحت کے لیے ہوائی اڈوں کو زیادہ سے زیادہ پرکشش بنایا جائے۔
سعودی ویب سائٹ کے مطابق سعودی عرب نے بین الاقوامی مسافروں کے لیے مملکت اور اس کے ہوائی اڈوں کو پرکشش بنانے کے لیے ایئرپورٹ فیس میں 35 فیصد کمی کا عزم ظاہر کیا ہے۔
ایئرپورٹ فیس میں کمی کے فیصلے پر عمل درآمد ریاض، جدہ اور دمام کے ہوائی اڈوں سے کیا جائے گا۔
ذرائع کا کہنا ہے کہ تخفیف کا فیصلہ اسی سال نافذ ہوگا، سعودی محکمہ شہری ہوا بازی ہوائی اڈوں کو معقول حد تک فیس میں کمی کا اختیار دے گا۔
خیال رہے کہ شہری ہوا بازی نے 15 جولائی 2022 سے سعودی عرب کی فضائی حدود دنیا بھر کی ایئر لائنز کے لیے کھولنے کا اعلان کیا تھا۔
ہر وہ ایئر لائن جو سعودی محکمہ شہری ہوا بازی کے مقررہ قواعد و ضوابط پورے کرے گی اسے سعودی عرب کی فضائی سرحدیں استعمال کرنے کی اجازت ہوگی۔
سعودی محکمہ شہری ہوا بازی نے ٹویٹر پر کہا ہے کہ سعودی عرب شکاگو معاہدہ 1944 کے تحت عائد ہونے والی پابندیاں پوری کرنا چاہتا ہے۔
اسی جذبے کے تحت طے کیا گیا ہے کہ بین الاقوامی شہری ہوا بازی میں استعمال ہونے والے مسافر ہوائی جہازوں کے ساتھ کسی قسم کا کوئی امتیاز نہیں برتا جائے گا۔
سعودی عرب چاہتا ہے کہ وہ 3 براعظموں کو جوڑنے والے خصوصی محل وقوع کی اپنی پوزیشن دنیا بھر میں مضبوط بنائے، اسی تناظر میں مملکت کی فضائی حدود تمام ایئر لائنز کے لیے کھولنے کا فیصلہ کیا گیا ہے۔
