The news is by your side.

Advertisement

سعودی عرب، مہنگے داموں ماسک فروخت کرنے والوں‌ کی شامت آگئی

ریاض: سعودی عرب میں مہنگے داموں ماسک فروخت کرنے والے غیرملکی گروہ کو گرفتار کرلیا گیا۔

عرب میڈیا کے مطابق سعودی وزارت تجارت کی چھاپہ مار ٹیموں نے میڈیکل ماسک کی آن لائن بلیک مارکیٹنگ کرنے والے غیرملکی گروہ کو گرفتار کرکے ان کے قبضے سے ایک لاکھ 40 ہزار ماسک برآمد کرلیے۔

سعودی وزارت تجارت کے مطابق ملزمان موجودہ صورتحال سے فائدہ اٹھاتے ہوئے طبی ماسک ذخیرہ کرنے کے بعد انہیں مہنگے داموں آن لائن فروخت کررہے تھے۔

وزارت تجارت کی جانب سے متعدد بار انتباہ دیا جاچکا ہے کہ کسی قسم کی طبی اشیا مہنگے داموں فروخت کرنے کے لیے ذخیرہ نہ کی جائیں، خلاف ورزی کے مرتکب افراد کے بارے میں رپورٹ کرنے کے لیے ایپلی کیشن بھی لانچ کی ہے جس کا عنوان ’بلاغ تجاری‘ یعنی تجارتی خلاف ورزی کی رپورٹ رکھا گیا ہے۔

مزید پڑھیں: سنیی ٹائزر پینے والوں کو گرفتار کرنے کا حکم

وزارت نے تجارتی جعل سازی اور دیگر خلاف ورزیوں کے لیے ٹول فری نمبر 1900 بھی مخصوص کیا گیا ہے جس پر ذخیرہ اندوزی کرنے والوں کے بارے میں اطلاع دی جاسکتی ہے۔

واضح رہے کہ کرونا وائرس کی وجہ سے میڈیکل ماسک اور جراثیم کش محلول کی طلب میں غیرمعمولی اضافہ ہوگیا ہے، ماسک اور سینیٹائرز کی بڑھتی ہوئی طلب کے پیش نظر منافع خوروں نے مارکیٹ سے بڑی تعداد میں ماسک اور جراثیم کش محلول اسٹاک کرنا شروع کردیا۔

وزارت تجارت کا کہنا ہے کہ تفتیشی ٹیمیں ذخیرہ اندوزوں کے خلاف سرگرم عمل ہیں، لوگوں کو چاہئے کہ وہ ایسے ذخیرہ اندوزوں کے بارے میں مطلع کریں۔

fb-share-icon0
Tweet 20

Comments

comments

یہ بھی پڑھیں