The news is by your side.

Advertisement

سعودی عرب : عوام ماہ رمضان میں فرضی اشتہارات سے محتاط رہیں

ریاض : فیڈریشن آف سعودی چیمبرز اینڈ کامرس کی نمائندہ کمیٹی برائے انسانی وسائل کی جانب سے خبردار کیا گیا ہے کہ گھریلو خادماؤں کے حوالے سے سوشل میڈیا پر موجود جعلی اشتہارات پر توجہ نہ دی جائے۔

جعل ساز سستی ماہانہ اُجرت میں خادمہ کو بیرون ملک سے لانے کے اشتہار کے ذریعے سادہ لوح افراد کے بینک اکاؤنٹس کو ہیک کرکے ان کی رقم اڑا لیتے ہیں۔

عاجل نیوز نے سعودی فیڈریشن آف چیمبر اینڈ کامرس میں انسانی وسائل کے امور سے متعلق کمیٹی کے حوالے سے مزید کہا ہے کہ فرضی کمپنیوں کے اشتہارات میں اس امر کی بھی ترغیب دی جاتی ہے کہ موجود خادمہ کی کفالت تبدیل کرائی جاسکتی ہے۔

خادمہ کی کفالت کی تبدیلی حوالے سے جعلساز اپنے شکار کو لنک ارسال کرکے یہ ظاہر کرتے ہیں کہ لنک کمپنی کا ہے جہاں درکار معلومات اپ لوڈ کی جائیں۔

ایوان صنعت کا مزید کہنا تھا کہ لنک کے ذریعے جعل ساز اپنے شکار کی تمام معلومات حاصل کرلیتے ہیں جن میں بینک کی تفصیلات بھی موجود ہوتی ہیں جس کے بعد جعل ساز ہیکرز بینک اکاؤنٹ کو ہیک کرکے وہاں موجود رقم کسی اور اکاؤنٹ میں منتقل کردیتے ہیں۔

اس حوالے سے ایوان صنعت وتجارت نے شہریوں کو سختی سے خبردار کیا ہے کہ وہ کسی بھی صورت غیر معروف اشتہارات کے چکر میں نہ پڑیں تاکہ دھوکے کا شکار ہونے سے بچ سکیں۔

واضح رہے کہ رمضان المبارک کے دوران سعودی عرب میں گھروں میں کام کرنے والی خادماؤں کی کافی طلب ہوتی ہے۔

ایسی غیر قانونی طور پر مقیم خادمائیں جن کی ماہانہ تنخواہ 12 سو ریال ہوتی ہے وہ ان دنوں 5 سے 6 ہزار ریال ایک ماہ کےطلب کرتی ہیں۔

Comments

یہ بھی پڑھیں