سعودی وزارت حج و عمرہ نے اس سال بھی فریضہ حج کی ادائیگی کیلئے بیرون ممالک سے آنے والے عازمین حج کی سہولت کیلئے ان کی خدمات کیلئے خصوصی اسکواڈ مقرر کیا ہے۔
اس حوالے سے سعودی وزارت حج و عمرہ کی جانب سے مسلسل تیسرے سال بھی معذور افراد اور یتیموں کے حج کے لیے قومی اقدام کا آغاز کردیا گیا ہے، جس کے تحت یہ افراد آرام اور سکون کے ساتھ مناسک حج ادا کرسکیں گے۔
یہ اقدام معذور افراد کے عالمی دن کے ایک حصے کے طور پر شروع کیا گیا ہے۔ اس اقدام کا مقصد سعودی وژن 2030 کے مطابق معذوروں اور یتیم افراد کو آسانی سے حج کرنے کے قابل بنانا ہے۔
سعودی وزارت حج و عمرہ نے خدمت ایجنسیوں کے ساتھ مل کر معذور افراد کیلئے مناسک ادا کرنے کے مقامات مخصوص کرنے اور جمرات کی رمی کرنے کے لیے خصوصی راستے مختص کیے ہیں۔ اس پروگرام کے تحت مفتی اور رضاکاروں کو چوبیس گھنٹے خدمت کرنے کے لیے فراہم کیا جائے گا۔
