سعودی حکام نے اس سخت گرمی میں حجاج کرام کو مقدس مقامات تک پہچانے کے لئے نئی سہولت متعارف کرادی۔
رپورٹ کے مطابق سخت گرمی میں حجاج کو مقدس مقامات تک آمد و رفت کے لئے بغیر ڈرائیور کے "سیلف ڈرائیونگ” بسیں فراہم کر دی گئیں ہیں۔
سعودی حکومت نے پہلی بار ان بس کو حجاج کے لئے متعارف کروایا ہے، بس میں گیارہ افراد کے بیٹھنے کی گنجائش ہے۔
حکام نے بتایا کہ آرٹیفیشل انٹیلجنس سے چلنے والی یہ گاڑیاں 6 گھنٹے بیٹری پر چلائی جاسکتی ہیں۔
حکام نے بتایا کہ یہ پہلا منصوبہ ہے کہ پہلی بار حج کے دوران اس طرح کی سیلف ڈرائیونگ ٹیکنالوجی کو لاگو کیا گیا ہے۔
اس کے علاوہ سعودی ٹرانسپورٹ جنرل اتھارٹی نے گزشتہ سال کے کامیاب تجربے کے بعد اس سال عازمین حج کو ایام حج کے دوران آمدورفت میں آسانی کے لیے الیکٹرک اسکوٹر مہیا کیے ہیں۔
رپورٹ کے مطابق یہ الیکٹرک اسکوٹر ایک ہزار کی تعداد میں مہیا کیے گئے ہیں۔ اس سروس کی فراہمی سے عازمین کو حج مقامات پر آمدورفت میں آسانی ہوگی اور وہ مناسک حج کی ادائیگی کے لیے آمدورفت کا وقت بچا سکیں گے۔
واضح رہے کہ دنیا بھر سے 20 لاکھ عازمین حج کے فریضے کی ادائیگی کے لیے مکہ مکرمہ پہنچ گئے ہیں۔
