ریاض: سعودی عرب میں فلسطینی ریاست بنانے کی تجویز پر سعودی عرب، متحدہ عرب امارات اور کویت نے سخت رد عمل ظاہر کیا ہے۔
سعود ی وزارت خارجہ نے اسرائیلی وزیر اعظم کے بیان کے بعد کہا ہے کہ فلسطینی عوام کا اپنی سرزمین پر حق ہے، وہ تارکین وطن نہیں ہیں، جنھیں اسرائیل غاصبانہ قبضہ کر کے بے دخل کر سکتا ہے۔
سعودی وزارت خارجہ نے کہا دو ریاستی حل کے بغیر خطے میں پائیدار امن قائم نہیں کیا جا سکتا، فلسطینی ریاست کے قیام کے بعد ہی تعلقات ممکن ہیں۔ یو اے ای نے بھی اسرائیلی وزیر اعظم نیتن یاہو کے بیان کو قابل مذمت اور اشتعال انگیز قرار دیا۔ اردن، عراق اور کویت کی جانب سے بھی نیتن یاہو کے بیان کی شدید مذمت کی گئی ہے۔
مصر نے بھی نتین یاہو کی تجویز کی مذمت کرتے ہوئے اسے غیر ذمے دارانہ قرار دیا، مصر کی وزارتِ خارجہ نے کہا نیتن یاہو کی تجویز سعودی عرب کی خودمختاری کی خلاف ورزی ہے اور مملکت کی سیکیورٹی مصر کے لیے سرخ لکیر ہے، مصر نے عرب لیگ کا ہنگامی اجلاس بھی طلب کر لیا ہے۔
حماس کی بڑی فتح، اسرائیلی فوج غزہ کے نیٹزارم کوریڈور سے سے نکل گئی
گزشتہ روز اسرائیلی وزیر اعظم نیتن یاہو نے سعودی عرب میں فلسطینی ریاست بنانے کا بیان دیا تھا، امریکا میں ایک چینل کو انٹرویو میں نیتن یاہو نے کہا تھا کہ فلسطینی ریاست کا قیام اسرائیل کی سلامتی کے لیے خطرہ ہے، سعودی عرب فلسطینی ریاست اپنے ملک میں بنا سکتا ہے، سعودیوں کے پاس بہت زیادہ زمین ہے، اس لیے اسے اپنے ملک کے اندر فلسطینی ریاست بنانی چاہیے۔
