ریاض : سعودی وزارت سیاحت نے ایک نئے ضابطے کی منظوری دے دی ہے جس کے تحت سعودی شہری اپنے گھر بیرون ملک سے آنے والوں کو کرائے پر دے سکیں گے۔
تفصیلات کے مطابق میں سعودی عرب میں غیرملکیوں کو سستی رہائش گاہیں ملنے کی راہ ہموار ہوگئی ہے، اس حوالے سے ایک قانون بھی منظور کرلیا گیا ہے۔
سعودی عرب کے وزیر سیاحت احمد الخطیب نے کہا کہ مملکت کے قانون میں ان ترامیم کا مقصد قومی سیاحت کے فروغ اور اس شعبے کی مزید ترقی ہے جس کے لیے مرتب کی گئی حکمت عملی کے اہداف کو مکمل کرنا ہے۔
انہوں نے متعلقہ حکام کو ہدایت دی کہ محکمے کی جانب سے فراہم کردہ خدمات کے معیار کو بہتر بنایا جائے اور سیاحوں کے حقوق کا تحفظ کیا جائے، اس کے علاوہ اس شعبے میں نوجوانوں کو روزگار کی فراہمی کے مواقع میں اضافہ کیا جائے۔
غیرملکی خبر رساں ادارے العربیہ نیوز کی رپورٹ کے مطابق نئے قواعد و ضوابط کے تحت نجی سیاحتی مہمان نوازی کی سہولت رہائشی یا زرعی استعمال کے لیے مختص جائیداد کا حصہ ہوگی اور ایک پراپرٹی میں کسی شخص کو جاری کیے گئے اجازت ناموں کی کل تعداد 3 سے زیادہ نہیں ہوگی۔
صرف سعودی شہری ہی اس کیلئے درخواست دے سکتے ہیں، اس کے لیے درخواست دہندہ کو ایک درخواست فارم بھرنا ہوگا، شرائط میں ایک الیکٹرانک ٹائٹل ڈیڈ یا الیکٹرانک لیز کا معاہدہ بھی شامل ہے جو اجازت نامہ سے متعلق جائیداد کی ملکیت یا استعمال کے حق کو ثابت کرتا ہے اور درخواست دہندگان اور نجی سیاحت کی مہمان نوازی کی سہولت کے سرکاری ڈیٹا کو اپ ڈیٹ کیا گیا ہے۔
