ریاض: سعودی عرب میں مقامی ڈاکٹر نے ایک پاکستانی زائر خاتون کی جان بچا لی، جو عمرے کے لیے سعودی عرب میں موجود تھیں۔
تفصیلات کے مطابق عمرے کے لیے جانے والی ایک پاکستانی خاتون کو اچانک تنفس کے شدید عارضے کی شکایت ہو گئی تھی، سعودی ڈاکٹروں نے انھیں بروقت طبی امداد پہنچا کر ان کی جان بچا لی۔
عاجل ویب سائٹ کے مطابق اجیاد ایمرجنسی اسپتال کے ڈاکٹروں نے کنگ عبداللہ میڈیکل سٹی کے تعاون سے پاکستانی خاتون کی جان بچانے کے لیے فوری طور پر طبی امداد فراہم کی۔
پاکستانی خاتون کو مسجد الحرام سے اجیاد اسپتال کے ایمرجنسی وارڈ لایا گیا تھا، خاتون کو سانس لینے میں بہت زیادہ دشواری پیش آ رہی تھی، ڈاکٹروں کا کہنا تھا کہ خاتون کو پہلے ہنگامی ابتدائی طبی امداد فراہم کی گئی، اس کے بعد مرض کی تشخیص کی گئی اور انتہائی نگہداشت کے شعبے میں داخل کر کے ان کا ایکمو ٹیکنالوجی کی مدد سےعلاج کیا گیا۔
سعودی ڈاکٹروں کے مطابق ان کے علاج سے خاتون کے خون میں آکسیجن کی مقدار مطلوبہ حد تک بڑھ گئی۔
