ریاض: سعودی عرب میں غیر قانونی تارکین وطن کے بچوں کو اسکولوں میں داخلے کی اجازت دے دی گئی، سرکاری اسکول انتظامیہ کو ہدایات جاری کردی گئیں۔
سعودی ویب سائٹ کے مطابق سعودی وزارت تعلیم نے کہا ہے کہ مملکت میں غیر قانونی طور پر مقیم تارکین وطن کے بچوں کو نئے تعلیمی سال کے دوران داخلے کے مواقع دیے جائیں گے۔
وزارت تعلیم کا کہنا ہے کہ سرکاری اسکول انتظامیہ غیر قانونی طور پر مقیم غیر ملکیوں کے بچوں کو داخلہ فارم فراہم کریں اور انہیں ہدایت کی جائے کہ وہ ضروری کارروائی کے لیے متعلقہ گورنریٹ سے رجوع کریں، گورنریٹ سے منظوری کے بعد فارم اسکول میں جمع کروایا جائے۔
وزارت تعلیم نے مملکت کے تمام تعلیمی اداروں کی انتظامیہ سے کہا ہے کہ ہر تعلیمی زون میں داخلہ لینے والے طلبہ کے اعداد و شمار ماہانہ بنیاد پر فراہم کیے جائیں۔
وزارت کی جانب سے کہا گیا کہ غیر قانونی طور پر مقیم غیر ملکیوں کے بچوں کو اسکولوں میں داخلہ دینے کے لیے داخلہ فارم کے ضوابط مقرر ہیں، فارم میں طالب علم اور اس کے والدین کے کوائف درج کرنا ہوں گے۔ پاسپورٹ، اقامہ، وزٹ ویزا یا بیانیے کے مطابق معلومات درج کی جائیں گی۔
فارم میں مستقل رہائش کا پتہ اور رابطے کے لیے مطلوبہ معلومات بھی درج کرنا ہوں گی۔
علاوہ ازیں بچے کے سرپرست کو یہ اقرار نامہ بھی جمع کروانا ہوگا کہ اس کے پاس قانونی اقامہ نہیں ہے اور وہ تعلیمی سال کے دوران اپنے قیام کو قانون کے دائرے میں لانے کے لیے ضروری شناختی دستاویزات حاصل کرلے گا۔
