اوکاڑہ:وفاقی وزیرمذہبی امور نورالحق قادری کا کہنا ہے کہ سعودی حکومت نے حج کیلئے ابھی تک کوئی اپ ڈیٹ نہیں دی ، اس حوالے سے ہم مسلسل رابطےمیں ہیں۔
تفصیلات کے مطابق وفاقی وزیرمذہبی امور نورالحق قادری نے جامعہ اشرف المدارس میں گفتگو کرتے ہوئے کہا کچھ ممالک کیلئےسعودی عرب کے ایس اوپیز بہت سخت ہیں، سعودی حکومت نے حج کیلئے ابھی تک کوئی اپ ڈیٹ نہیں دی۔
نورالحق قادری کا کہنا تھا ہم سعودی حکومت سےمسلسل رابطےمیں ہیں، سعودی عرب سے ابھی تک حج کیلئے ایم اویونہیں ہوا۔
گذشتہ روز وزیرمذہبی امور نورالحق قادری نے اے آر وائی نیوز کے پروگرام باخبر سویرا میں گفتگو کرتے ہوئے کہا تھا کہ سعودی عرب اب بھی حجاج کرام سے حج کے لئے درخواستیں قبول نہیں کررہا ، امیدہے اگلے 5ماہ میں صورتحال بہترہوجائےگی ، ویکسین آنے کے بعد امید ہے حج ادائیگی معمول کے مطابق ہوگی۔
وزیر نے بتایا کہ سعودی حکام کی جانب سے حج کے حوالے سے کوئی واضح احکام نہیں آئے اور نہ ابھی تک حج سے متعلق پاکستان کے ساتھ مفاہمت کی یادداشت پر دستخط کیے ہیں۔
