ریاض: سعودی حکومت نے پیٹرول نرخوں کے حوالے سے انتباہ جاری کرتے ہوئے کہا ہے کہ نرخوں کی پابندی نہ کرنے والوں کے خلاف کارروائی ہوگی۔
تفصیلات کے مطابق سعودی وزارتِ تجارت نے سخت کارروائی کا عندیہ دیتے ہوئے کہا ہے کہ پیٹرول کے نئے نرخوں کی پابندی کی جائے ورنہ خلاف ورزی کرنے والے پیٹرول اسٹیشنز کے خلاف سخت کارروائی ہوگی۔
اس سلسلے میں سعودی عرب کے تمام علاقوں میں نگراں ٹیموں نے پیٹرول اسٹیشنز پر اچانک چھاپے مارنا بھی شروع کر دیا ہے، اس امر کو یقینی بنایا جا رہا ہے کہ پیٹرول اسٹیشنز پر الیکٹرانک اسکرینز پر نئے نرخ ڈالے گئے ہیں یا نہیں۔
بڑی کمی، سعودی عرب میں پیٹرول کے نئے نرخ جاری
نگران ٹیمیں اس بات کو بھی یقینی بنا رہی ہیں کہ پیٹرول بھرتے وقت نئے نرخوں کی پابندی کی جا رہی ہے یا نہیں، نگراں ٹیمیں نئے نرخوں کی پابندی نہ کرنے والے پیٹرول اسٹیشنز کے خلاف صارفین سے رپورٹس بھی لے رہی ہیں۔
وزارتِ تجارت کی جانب سے شکایات کے لیے رابطہ نمبر 1900 جاری کرتے ہوئے اپیل کی گئی ہے کہ جو اسٹیشنز نئے نرخوں کی پابندی نہیں کر رہے ہیں، ان کے خلاف رپورٹ کریں۔
واضح رہے کہ سعودی آرامکو نے پیر کو مئی کے لیے پیٹرول کے نئے نرخوں کا اعلان کیا تھا، جس کے مطابق ایک لیٹر 91 پیٹرول کی قیمت 1.31 ریال سے کم ہو کر 0.67 ھللہ اور 95 پیٹرول کی قیمت 1.47 ریال سے کم ہو کر 0.82 ھللہ ہو گئی ہے۔
