ریاض: سعودی عرب میں ارکان شوریٰ نے مطالبہ کیا ہے کہ ملازمت کے لیے سعودی شہریوں پر تجربے کی شرط ختم کی جائے۔
سعودی ویب سائٹ کے مطابق سعودی ارکان شوریٰ نے منگل کو وزارت افرادی قوت و سماجی بہبود کی سالانہ مالیاتی رپورٹ برائے 2021 پر بحث کی۔
ارکان شوریٰ نے رپورٹ پر متعدد حوالوں سے بحث کی، رکن شوریٰ فیصل طمیحی نے مطالبہ کیا کہ پرائیویٹ سیکٹر کی کمپنیاں اور ادارے ملازمت کے متلاشی مقامی شہریوں سے تجربہ سرٹیفکیٹ طلب نہ کریں۔
ایک خاتون رکن شوریٰ سلطانہ البدیوی نے مطالبہ کیا کہ مکان اسکیم کے تحت مطلقہ کے ساتھ نرمی برتی جائے اور مکان سے متعلق مطلقہ کی درخواست پر عائد شرائط ختم کی جائیں۔
انہوں نے کہا کہ اسے مکان فراہم کرنے کے لیے اپنی اولاد کو ساتھ رکھنے کی شرط ہٹا دی جائے، اسے آزاد اور خود مختار شخصیت کے طور پر لیا جائے اور اسی بنیاد پر اسے رہائش کی سہولت دی جائے۔
ایک اور خاتون رکن شوریٰ عائشہ ذکری نے توجہ دلائی کہ سرکاری اور پرائیوٹ سیکٹرز کے تمام ملازمین کو خاص شرائط اور ضوابط کے ساتھ جز وقتی ملازمت کی اجازت دی جائے، انہیں آن لائن ملازمت کا موقع فراہم کیا جائے اور اس سلسلے میں نئے قانون بنائے جائیں۔
