ریاض :سعودی عرب کے دارالحکومت ریاض میں ایک مقامی طالبہ اپنی اسکول وین سے اترتے ہوئے حادثاتی طور پر اسی کے نیچے کچلی گئی۔
تفصیلات کے مطابق یہ واقعہ ریاض کے علاقے الشفاءمیں پیش آیا،سوشل میڈیا پر سعودی حلقوں کی جانب سے وائرل ہونے والی وڈیو سے معلوم ہوا کہ سعودی طالبہ لیان ترکی مبارک کی اسکول وین واپسی پر لیان کے گھر کے سامنے آ کر رکی۔
عرب میڈیا کا کہنا تھا وڈیو کلپ سے ظاہر ہوتا ہے کہ لیان کے وین سے اترتے ہوئے اس کا برقع اٹک گیا، اس دوران ڈرائیور نے لا علمی کے سبب وین چلا دی اور لیان کو کھینچتی ہوئی آگے لے گئی جس کے نتیجے میں وہ شدید زخمی ہو گئی۔
محکمہ تعلیم کے ترجمان علی الغامدی نے ایک سرکاری بیان میں واضح کیا کہ طالبہ کی وفات کا سبب بننے والی گاڑی ایک پرائیوٹ وین ہے اور وہ ریاض کے محکمہ تعلیم کے زیر انتظام نہیں۔
الغامدی کے مطابق طالبہ لیان کو زخمی حالت میں کنگ سعود میڈیکل سٹی منتقل کیا گیا جہاں وہ بعد میں چل بسی۔
ترجمان نے محکمہ تعلیم کی جانب سے طالبہ کے اہل خانہ کو تعزیت پیش کی اور مرحومہ طالبہ کے لیے مغفرت کی دعا کی۔
