ریاض : سعودی عرب کے شاہ عبداللہ مذہبی ہم آہنگی سینٹرکے سیکریٹری فیصل بن عبدالرحمٰن کو اقوام متحدہ نے مشیر برائے مذہبی ہم آہنگی تعینات کردیا۔
تفصیلات کے مطابق اقوام متحدہ کی مشاورتی کونسل کی جانب سے سعودی عرب کے شاہ عبداللہ بن عبدالعزیز بین المذاہب ڈائیلاگ سینٹر کے جنرل سیکریٹری فیصل بن عبدالرحمٰن بن معمر کو اقوام متحدہ میں مشیر برائے مذہبی امور تعینات کردیا گیا ہے۔
غیر ملکی خبر رساں ادارے کا کہنا تھا کہ نیو یارک میں اقوام متحدہ کی جنرل اسمبلی کے منعقدہ اجلاس میں اقوام متحدہ کی مذہبی امور کی کمیٹی نے فیصل بن عبدالرحمٰن کو مشیر مقرر کیا ہے۔
نو منتخب مشیر برائے مذہبی امور اقوام متحدہ فیصل بن عبد الرحمٰن نے میڈیا سے گفتگو کرتے ہوئے کہا کہ اقوام متحدہ میں مذہبی امور کی ذمہ داری ملنے پر خوشی ہے۔
مشیر برائے مذہبی ہم آہنگی کا کہنا تھا کہ اقوام متحدہ کی جانب سے مجھے یو این کا مشیر منتخب کرنا ’شاہ عبداللہ بن عبدالعزیز بین المذاہب ڈائیلاگ سینٹر‘ میں میری خدمات کا اعتراف کرنا ہے۔
فیصل بن عبدالرحمٰن نے اقوام متحدہ کا شریہ ادا کرتے ہوئے اقوام متحدہ اور شاہ عبداللہ بن عبدالعزیز بین المذاہب ڈائیلاگ سینٹر کے زیر اہتمام مذہبی ہم آہنگی کے حوالے سے سرانجام دئیے جانے والے امور کو سراہا بھی تھا۔
ان کا مزید کہنا تھا کہ شاہ عبداللہ مذہبی ہم آہنگی مرکز نے دیگر مذاہب کے ماننے والوں کو اسلام کے قریب کرنے کے لیے بھرپور کوششیں کی ہیں اور مشیر برائے اقوام متحدہ کی حیثیت سے بھی اسلام پر اٹھائے جانے والے خدشات کو دور کرنے کے لیے کوششیں کرتے رہے گے۔
