اسلام آباد: سپریم کورٹ پریکٹس اینڈ پروسیجر کمیٹی کا نیا پروسیجر 2025 جاری کر دیا گیا جس کی منظوری چیف جسٹس پاکستان یحییٰ آفریدی کی سربراہی میں کمیٹی نے دی، ایکٹ 2023 کے تحت نئے ضوابط اب نافذ العمل ہوں گے۔
سپریم کورٹ پریکٹس اینڈ پروسیجر کمیٹی کی سربراہی چیف جسٹس یحییٰ آفریدی کر رہے ہیں جبکہ کمیٹی میں جسٹس منصور علی شاہ اور جسٹس امین الدین شامل بھی ہیں۔
یہ بھی پڑھیں: سروسز چیفس کی مدت ملازمت اور پریکٹس اینڈ پروسیجر سمیت بلز کا نوٹیفکیشن
جاری کیے گئے نوٹیفکیشن کے مطابق چیف جسٹس پاکستان فزیکل یا ورچوئل کسی بھی طریقے سے کمیٹی کا اجلاس بلا سکتے ہیں، کمیٹی کے اجلاس کیلیے کم از کم دو ارکان کا موجود ہونا لازمی ہے، کمیٹی بینچوں کی تشکیل ماہانہ یا ہر 15 روز میں کرے گی۔
نوٹیفکیشن کے مطابق ایک بار تشکیل بینچ میں ترمیم ممکن نہیں جب تک یہ طریقہ کار اجازت نہ دے، کمیٹی میں چیئرمین یا رکن کی تبدیلی بینچ کی تشکیل کو غیر قانونی نہیں بنائے گی، جب چیف جسٹس پاکستان ملک سے باہر یا دستیاب نہ ہوں تو خصوصی کمیٹی تشکیل دے سکتے ہیں، خصوصی کمیٹی جج کی بیماری، وفات، غیر موجودگی یا علیحدگی پر بینچ میں تبدیلی کر سکتی ہے۔
مزید یہ کہ ہنگامی فیصلوں کو تحریری طور پر ریکارڈ کرنا اور وجوہات درج کرنا لازمی ہوگا، ایسی تبدیلیاں کمیٹی کے اگلے اجلاس میں پیش کی جائیں گی، رجسٹرار ہر اجلاس، فیصلے اور تبدیلی کا مکمل ریکارڈ محفوظ رکھے گا۔
اس میں کہا گیا کہ کمیٹی کو اختیار ہے کہ وہ وقتاً فوقتاً ان ضابطوں میں ترمیم کر سکتی ہے، یہ ضابطے دیگر قواعد پر بالادست ہوں گے جب تک یہ مؤثر ہیں۔
