ڈراؤنے مذاق کا نتیجہ نہایت غلط بھی نکل سکتا ہے، ایسی ہی ایک ویڈیو انسٹاگرام پر وائرل ہو رہی ہے، جس میں ایک شوہر بیوی کو ڈرانے کے بھیانک انجام سے بال بال بچ گیا۔
ایک ویڈیو وائرل ہوئی ہے جس میں بیوی کو ڈراؤنے مذاق کا نشانہ بنانے پر شوہر کا سر پھٹنے سے بال بال بچا، اور اس کی بجائے دیوار پر لگا شیشہ ٹوٹ گیا۔
ویڈیو میں دیکھا جا سکتا ہے کہ ایک شخص نے اپنی بیوی کو اتنا خوف زدہ کیا کہ اس نے تقریباً اس کا سر ہتھوڑے سے کچل ہی ڈالا تھا، لیکن خوش قسمتی سے سر کی بجائے ہتھوڑا شیشہ میں جا لگا۔
کلپ کا آغاز شوہر کے آئینے کے پاس ایک خوفناک سبز ماسک میں کھڑے ہونے سے ہوتا ہے، جیسے ہی اس کی بیوی کمرے میں داخل ہوئی، وہ اسے ڈرانے کے لیے چیخا، بیوی نے اضطراری حالت میں چیختے ہوئے ہتھوڑا اس کے سر پر دے مارا۔
لیکن آدمی نے سر ہتھوڑے سے لمحوں کے اندر بچا لیا، خاتون نے اتنی قوت سے ہتھوڑا چلایا تھا کہ اگر لگ جاتا تو اس شخص کے سر پر جان لیوا چوٹ آ سکتی تھی۔
اس کے بعد کلپ میں جوڑے کو بیٹھے ہوئے اور مذاق کے غلط ہونے کے بارے میں اپنا تجربہ شیئر کرتے ہوئے دکھایا گیا ہے، شوہر کا کہنا تھا وہ گزشتہ 24 سالوں سے ایک دوسرے کے ساتھ مذاق کر رہے ہیں اور میں نے ابھی تک اپنی بیوی کو ڈرانے کا موقع نہیں چھوڑا ہے۔
ویڈیو کے آخر میں، شوہر نے بیوی سے پوچھا کہ کیا وہ اس مذاق پر اسے معاف کر دے گی، تو بیوی نے جواب دیا کہ مجھے یہ آئینہ بہت پسند تھا۔
یاد رہے کہ ڈراؤنا مذاق اکثر غلط بھی ہو سکتا ہے اور بعض اوقات وہ خوف ناک حد تک غلط ہو جاتا ہے، کبھی کبھی اس کے نتیجے میں موت بھی واقع ہو سکتی ہے، اس لیے اس سے گریز کرنا چاہیے۔
