لاہور/ پشاور: کرونا کیسز میں کمی آنے کے بعد پنجاب اور کے پی میں سخت گرمی عوام کا امتحان لینے لگی، صورت حال کے باعث اسکولوں کے اوقات کار تبدیل کردئیے گئے ہیں۔
تفصیلات کے مطابق صوبائی وزیر تعلیم پنجاب ڈاکٹر مراد راس نے پنجاب بھر میں اسکولوں کے اوقات کار تبدیل کرنے کے حوالے سے ٹویٹ میں کہا کہ صوبے بھر میں اسکولز صبح سات بجے سے ساڑھے گیارہ بجے تک کھلیں گے، اوقات کار میں تبدیلی کا فیصلہ گرمی کی صورتحال مدنظر رکھ کر کیا گیا ہے۔
وزیر تعلیم پنجاب نے اپنے ٹوئٹ میں کہا کہ اسکولوں کے لئے جاری کردہ نئے اوقات کار کا انعقاد تمام سرکاری و نجی تعلیمی اداروں پر ہو گا، اسکول انتظامیہ حکومت پنجاب کی جانب سے جاری کردہ کرونا ایس او پیز پر ہر ممکن عملدرآمد یقینی بنائیں۔
دوسری جانب صوبائی وزیر تعلیم شہرام ترکئی کی ہدایت پر پورے صوبے میں گرمی کی شدت بڑھنے کی وجہ سے صوبے کے اسکولوں کے اوقات کار سے متعلق فیصلے کا نوٹیفیکیشن جاری کردیا گیا ہے۔
نوٹی فیکیشن کے مطابق پرائمری اور مڈل کلاسز جمعہ اور ہفتہ 11 اور 12 جون کو بند رہیں گے پرائمری اور مڈل کلاسز بند یا کھلے رکھنے کا فیصلہ اتوار 13 جون کو کیا جائے گا۔
وزیر تعلیم شہرام ترکئی کے مطابق گریڈ 9 سے گریڈ 12 تک کے طلباء کے لئے اسکول کھلے ہونگے اور انہیں صرف وہ مضامین پڑھائے جائیں گے جسمیں امتحان ہوں گے، حاضری صبح سات بجے اور چھٹی 10 بجے ہوگی نئے اوقات کار اور ان تمام فیصلوں کا اطلاق تمام سرکاری و نجی سکولوں پر ہوگا۔
