کراچی: محکمہ موسمیات کا کہنا ہے کہ کراچی میں سمندری ہوائیں بند ہو گئی ہیں، گرمی کی شدت زیادہ محسوس ہوگی۔
تفصیلات کے مطابق موسمیات کے محکمے نے آج کراچی میں موسم گرم اور مرطوب رہنے کا امکان ظاہر کیا ہے، محکمے کا کہنا ہے کہ شہر میں درجہ حرارت 37 ڈگری سینٹی گریڈ تک جانے کا امکان ہے۔
موسمیات نے خبردار کیا ہے کہ شہر میں ہوا میں نمی کا تناسب زیادہ ہونے کی وجہ سے گرمی کی شدت زیادہ محسوس ہوگی۔
موسمیات کے مطابق سندھ میں مون سون سسٹم 30 جون سے داخل ہوگا، اور کراچی میں یکم جولائی سے مون سون کا پہلا اسپیل بارش برسائے گا۔
ملک کے بیش تر علاقوں میں آج موسم گرم اور مرطوب رہےگا، پشاور، لاہور اور کوئٹہ میں موسم گرم اور خشک رہے گا، جب کہ اسلام آباد، کشمیر اور گلگت بلتستان میں بارش کی توقع ہے، کراچی اور بدین سمیت سندھ اور بلوچستان کے ساحلی اضلاع میں گرج چمک کے ساتھ ہلکی بارش ہو سکتی ہے۔
