راولپنڈی: سیکیورٹی فورسز کے ڈی آئی خان میں کیے گئے آپریشن میں 2 خوارج مارے گئے۔
پاک فوج کے شعبہ تعلقات عامہ (آئی ایس پی آر) کا کہنا ہے کہ سیکیورٹی فورسز نے ڈی آئی خان کے علاقے کولاچی میں انٹیلیجنس بیسڈ آپریشن کیا اس دوران فائرنگ کے تبادلے میں 2 خوارج ہلاک ہوئے اور ایک کو زخمی حالت میں گرفتار کرلیا گیا۔
آئی ایس پی آر کا کہنا ہے کہ ہلاک دہشت گرد سیکیورٹی فورسز اور شہریوں پر حملوں میں ملوث تھے، ہلاک دہشت گردوں سے گولیاں اور ہتھیار برآمد کیے گئے ہیں۔
ترجمان پاک فوج کا کہنا ہے کہ علاقے میں دیگر دہشت گردوں کی تلاش کے لیے سینٹائزڈ آپریشن کیا گیا، سیکیورٹی فورسز دہشت گردی کے خاتمے کے لیے پرعزم ہیں۔
واضح رہے کہ دو روز قبل خیبرپختونخوا کے مختلف علاقوں میں سیکیورٹی فورسز کی کارروائیوں میں 22 خارجی دہشت گرد مارے گئے تھے جبکہ 6 جوانوں نے جام شہادت نوش کیا۔
سیکیورٹی فورسز نے شمالی وزیرستان میں کامیاب کارروائی کرتے ہوئے 10 دہشتگرد کو ہلاک کیا تھا جبکہ ٹانک میں دہشت گردوں کی موجودگی کی خفیہ اطلاعات پر آپریشن میں 9 خوارجی مارے گئے۔
تھل میں سیکیورٹی چیک پوسٹ پر خارجیوں کا حاملہ ناکام بنایا گیا، فائرنگ کے تبادلے میں 3 دہشت گرد ہلاک ہوئے تھے، واقعے میں دھرتی کے 6 بہادر سپوتوں نے بہادری سے لڑتے ہوئے جام شہادت نوش کیا۔
آئی ایس پی آر کا کہنا تھا کہ علاقے میں دہشت گردوں کی ممکنہ موجودگی پر سیکیورٹی فورسز کا آپریشن جاری ہے، فورسز ملک سے دہشت گردی کے ناسور کے مکمل خاتمے کے لیے پرعزم ہیں۔
