اسلام آباد : بلوچ طلبہ بازیابی کیس میں نگراں وزیراعظم انوار الحق کاکڑ کی ممکنہ پیشی کے پیش نظر اسلام آبادہائیکورٹ میں سیکیورٹی ہائی الرٹ کردی گئی۔
تفصیلات کے مطابق اسلام آبادہائیکورٹ میں بلوچ طلبہ بازیابی کیس کی سماعت آج ہوگی، جسٹس محسن اختر کیانی کیس کی سماعت کریں گے۔
عدالت نے آج نگراں وزیراعظم انوار الحق کاکڑ ،وزرا اور سیکریٹریز کو طلب کررکھا ہے، نگراں وزیراعظم کی ممکنہ پیشی کے پیش نظر اسلام آبادہائیکورٹ میں سیکیورٹی ہائی الرٹ کردی گئی ہے۔
نگراں وزیراعظم کا سیکیورٹی اسکواڈ اسلام آبادہائیکورٹ پہنچ گیا ہے، پولیس حکام کا کہنا ہے کہ نگراں وزیر اعظم ہائیکورٹ میں پیش ہوں گے۔
گذشتہ سماعت میں بلوچ طلبا عدم بازیابی کیس میں وزیراعظم پیش نہ ہوئے تھے، جس پر اسلام آباد ہائی کورٹ نے اٹھائیس فروری کو سماعت پر پھر ذاتی حیثیت میں طلب کرلیا تھا اور وزیرداخلہ اور وزیر دفاع کو بھی پیش ہونے کا حکم دیا تھا۔
جسٹس محسن اخترکیانی نے ریمارکس دیے تھے نگراں وزیراعظم کوبتادیں آئندہ سماعت پرکراچی نہ جائیں اور آئی ایس آئی، ایم آئی اور ایف آئی اے کے ڈی جیز پر مشتمل کمیٹی تشکیل دے دی، تین رکنی کمیٹی آئندہ سماعت پراسلام آباد ہائی کورٹ میں رپورٹ پیش کرے گی۔
