اسلام آباد: وفاقی دارالحکومت اسلام آباد میں دہشت گردی کے ممکنہ خطروں کو روکنے کے لیے پارلیمنٹ ہاؤس کی سیکیورٹی سخت کردی گئی، ناکوں پر ایف سی لگانے کا بھی فیصلہ کیا گیا ہے جبکہ پورے شہر میں مختلف مقامات پر سرچ آپریشن کیے جارہے ہیں۔
تفصیلات کے مطابق وفاقی دارالحکومت اسلام آباد میں پارلیمنٹ ہاؤس کی سیکیورٹی سخت کردی گئی، پارلیمنٹ ہاؤس کے بیرونی گیٹ پر فرنٹیئر کور (ایف سی) تعینات کردی گئی۔
پارلیمنٹ ہاؤس میں ملازمین کے علاوہ ہر قسم کا داخلہ بند کردیا گیا جبکہ کمیٹیوں کے اجلاس ملتوی کردیے گئے۔
مجموعی طور پر پورے شہر میں پولیس نے سیکیورٹی بڑھا دی ہے، مختلف مقامات پر سرچ آپریشن کیا جارہا ہے، اسلام آباد اور راولپنڈی کے لاری اڈوں اور ہوٹلز میں بھی سرچ آپریشن کیا جارہا ہے۔
علاوہ ازیں دہشت گردی کے واقعات روکنے کے لیے سیاحتی مقامات پر بھی سرچنگ کی جارہی ہے۔
دوسری جانب شہر میں ناکوں پر پولیس کی معاونت کے لیے ایف سی لگانے کا بھی فیصلہ کیا گیا ہے، کیپٹل پولیس نے ایف سی کے ایک ہزار اہلکار بلوا لیے۔
شہر کے 25 مقامات پر ناکوں کے لیے پولیس کے ساتھ ایف سی اہلکار بھی تعینات ہوں گے، پولیس کا کہنا ہے کہ ایف سی اہلکاروں کی تعیناتی سے ناکوں کی استعداد بڑھائی جا سکے گی۔
