اسلام آباد : وزیراعظم عمران خان کا کہنا ہے کہ اپوزیشن جماعتیں سینیٹ الیکشن جیتنے کیلئےہر حربہ استعمال کررہی ہیں لیکن اپوزیشن کی جانب سے پیسہ اور لالچ کے باوجود سینیٹ الیکشن میں کامیاب ہوں گے۔
تفصیلات کے مطابق وزیراعظم عمران خان سے پنجاب سے تعلق رکھنے والے ارکان اسمبلی کی ملاقات ہوئی ، ملاقات میں وزیراعلیٰ پنجاب عثمان بزدار اور مشیر خزانہ حفیظ شیخ بھی موجود تھے۔
وزیراعظم عمران خان نے ارکان پنجاب اسمبلی سے گفتگو کرتے ہوئے کہا عوامی نمائندوں کی جانب سے اٹھائےگئے عوامی مسائل حل کریں گے،پہلی بارپسماندہ علاقوں کو زیادہ ترقیاتی منصوبے دیئےجارہے ہیں، ہماری حکومت کی ترجیح عام آدمی اور پسماندہ علاقے ہیں۔
عمران خان کا کہنا تھا کہ اپوزیشن جماعتیں سینیٹ الیکشن جیتنے کیلئےہر حربہ استعمال کررہی ہیں، میں اسی لیے شفاف انتخابات کےلیے اوپن ووٹنگ کا حامی تھا، اراکین سے رابطے ہورہے ہیں مگر ہم متحد ہیں، اپوزیشن کی جانب سے پیسہ اور لالچ کے باوجود سینیٹ الیکشن میں کامیاب ہوں گے۔
دوسری جانب وزیراعظم نے حکومتی اور اتحادی ارکان اسمبلی کو آج ظہرانے پر بلا لیا ہے ، ارکان اسمبلی کو وزیراعظم ہاؤس میں ظہرانہ دیا جائے گا، ذرائع کا کہنا ہے کہ اراکین کوسینیٹ پولنگ ڈے پر حاضری یقینی کی ہدایت کی جائے گی۔
وزیراعظم عمران خان نے ارکان کو ظہرانے میں شرکت یقینی بنانے کی ہدایت کر دی۔
