اسلام آباد: سینیٹ کی قائمہ کمیٹی برائے خزانہ نے صوبہ بلوچستان کے شہر گوادر کو خصوصی اقتصادی ڈسٹرکٹ بنانے کا معاملہ وفاقی کابینہ کو بھیج دیا۔
تفصیلات کے مطابق سینیٹ کی قائمہ کمیٹی برائے خزانہ کا اجلاس چیئرمین سلیم مانڈوی والا کی زیر صدارت ہوا، اجلاس میں گوادر کے 1200 مربع کلو میٹر کے علاقے کو خصوصی اقتصادی ڈسٹرکٹ ڈکلیئر کرنے کا معاملہ زیر بحث آیا۔
نمائندہ بلوچستان حکومت کی جانب سے کہا گیا کہ وزیر اعلیٰ بلوچستان اور چیئرمین سینیٹ نے اس پر خصوصی اجلاس بلائے ہیں۔
کمیٹی نے گوادر کو خصوصی اقتصادی ڈسٹرکٹ بنانے کا معاملہ کابینہ کو بھیج دیا۔
اجلاس میں نیشنل ٹیرف کمیشن (این ٹی سی) حکام نے بتایا کہ لیکوڈ پیرافین پر کسٹم اور ایڈیشنل کسٹم ڈیوٹی صفر کرنے کی تجویز ہے، لیکوڈ سوڈا پر کسٹم ڈیوٹی 16 فیصد اور ایڈیشنل کسٹم ڈیوٹی 4 فیصد کرنے کی تجویز دی گئی ہے۔
این ٹی سی کی جانب سے کہا گیا کہ لیکوڈ سوڈا پر 4 ہزار فی میٹرک ٹن کسٹم ڈیوٹی اور 7 فیصد اے سی ڈی عائد ہے، کیلشیئم کی درآمد پر کسٹم ڈیوٹی 3 فیصد سے بڑھا کر 11 فیصد کرنے کی تجویز ہے۔
کمیٹی نے این ٹی سی کی متعدد تجاویز کی منظوری دے دی۔
