اسلام آباد: سینیٹ کی قائمہ کمیٹی برائے خزانہ کے اجلاس میں شرکا کو بتایا گیا کہ بچوں کے ڈبہ بند جوس پر 10 فیصد ایکسائز ڈیوٹی عائد کرنے سے جوس کی فروخت میں کمی آئی ہے۔
تفصیلات کے مطابق سینیٹ کی قائمہ کمیٹی برائے خزانہ کا اجلاس چیئرمین سلیم مانڈوی والا کی زیر صدارت ہوا، اجلاس میں بچوں کے ڈبے والے جوس پر 10 فیصد فیڈرل ایکسائز ڈیوٹی کا معاملہ زیر بحث آیا۔
جوس انڈسٹری کے نمائندے کی جانب سے کہا گیا کہ ڈبے کے جوس پر 18 فیصد سیلز ٹیکس ادا کرتے ہیں، جوس کے ڈبے پر 10 فیصد ایکسائز ڈیوٹی عائد ہونے سے فروخت کم ہوگئی ہے۔
نمائندے کی جانب سے کہا گیا ہے کہ جوس کی فروخت کم ہونے سے حکومت کا سیلز ٹیکس کم ہو رہا ہے، جب سے 10 فیصد ایکسائز عائد ہوا ہے جوس فیکٹریز ہر ماہ 11 دن بند رہتی ہیں۔
نمائندے کا مزید کہنا تھا کہ حکومت نے ایکسائز ڈیوٹی ختم کی تو جوس کی فروخت بڑھے گی اور سیلز ٹیکس زیادہ جمع ہوگا۔
