کراچی : مزاحیہ ڈراموں میں اداکاری کے جوہر دکھانے والی معروف اداکارہ دردانہ بٹ شدید علالت کے باعث وینٹی لیٹر پر منتقل کردی گئیں۔
تفصیلات کے مطابق پاکستان کے مزاحیہ ڈراموں میں یادگار کردار نبھانے والی ماضی کی مشہور اداکارہ دردانہ بٹ کی طبعیت کی خرابی سے متعلق اطلاع اداکار و میزبان خالد بٹ نے انسٹاگرام کے ذریعے دی۔
خالد بٹ نے ویڈیو و تصویر شیئرنگ ایپلی کیشن انسٹاگرام پر سینئر اداکارہ کی طبعیت خرابی سے متعلق بتایا کہ دردانہ بٹ شدید علیل ہیں انہیں طبعیت بگڑنے پر اسپتال منتقل کیا گیا تھا جہاں انہیں ڈاکٹروں نے انہیں وینٹی لیٹر پر منتقل کردیا ہے۔
خالد بٹ نے مداحوں سے دردانہ بٹ کی جلد صحت یابی دعاؤں کی اپیل کی ہے۔
واضح رہے کہ 83 سالہ دردانہ بٹ نے اداکاری کا آغاز 70 کی دہائی میں پاکستان ٹیلی ویژن کے مشہور کامیڈی ڈرامہ ’ففٹی ففٹی‘ میں معین اختر کے ساتھ کیا تھا۔
دردانہ بٹ نے اے آر وائی ڈیجیٹل کے مشہور ڈرامے ’ڈگ ڈوگی‘ میں اشرف کی ماں کا کردار نبھایا تھا جب کہ ڈرامہ رسوائی میں امّاں کا کرداد نبھایا تھا۔
سینئر اداکارہ کو ان کی بہترین صلاحیتوں کے اعتراف میں سال 1985 میں پی ٹی وی کی جانب سے بہترین اداکارہ کا ایوارڈ بھی دیا جا چکا ہے۔
