پاکستان کے سابق چیف سلیکٹر محمد وسیم نے شارجہ میں افغانستان کی ٹیم کے خلاف سیریز کے دوران ایک ہی وقت میں پانچ سینئر کھلاڑیوں کو آرام دینے کی پاکستان کرکٹ بورڈ کی حکمت عملی پر تنقید کی ہے۔
ایک مقامی میڈیا نیوز چینل کو انٹرویو کے دوران وسیم نے سینئر کھلاڑیوں کو آرام دینے کی حمایت کا اظہار کیا لیکن انہوں نے یہ بھی کہا کہ ایسے اچانک ٹاپ فائیو کھلاڑیوں کو بینچ کرنے کے بجائے ایک مناسب پالیسی کے ذریعے بٹھانا چاہیے تھا۔
انہوں نے کہا کہ ہوم سیریز نوجوان کھلاڑیوں کو موقع دینے اور سینئر کھلاڑیوں کو آرام دینے کا بہترین موقع فراہم کرتی ہے اور نیوزی لینڈ کی سیریز اس کے لیے زیادہ موزوں ہوتی۔
ان کا کہنا تھا کہ میری رائے میں آپ کی ہوم سیریز اپنے نوجوانوں کو آزمانے اور اپنے سینئر کھلاڑیوں کو آرام دینے کا بہترین موقع ہے ان کے سامنے شیڈول تھا، وہ جانتے تھے کہ نیوزی لینڈ آرہا ہے اور وہ بینچ اسٹرینتھ کے ساتھ آئیں گے اس لیے نوجوان کھلاڑیوں کو کھلانا چاہیے تھا۔
وسیم نے ان نوجوان کھلاڑیوں کے ساتھ ایک سینئر بلے باز کی اہمیت پر بھی زور دیا، جو پوری سیریز میں رہنمائی فراہم کر سکے۔