راولپنڈی: وطن کے لیے جان کا نذرانہ پیش کرنے والے شہدا کے خاندانوں کو پوری قوم خراجِ عقیدت پیش کیا کرتی ہے، وطنِ عزیز کی خاطر شہادت کو گلے لگانے والے نڈر سپاہی عرفان اللہ ان ہی شہیدوں میں سے ایک ہیں۔
سپاہی عرفان اللہ نے پاک ایران سرحد پر یکم اپریل 2023 کو دفاع وطن کے لیے دہشت گردوں کا جواں مردی اور دلیری کے ساتھ مقابلہ کرتے ہوئے جام شہادت نوش کیا تھا۔
سپاہی عرفان اللہ شہید کی اہلیہ کا کہنا ہے کہ ان کے شوہر بہت اچھے انسان تھے اور میرا بہت خیال رکھتے تھے، ان کی کمی تو ضرور محسوس ہوگی لیکن مجھے ان کی شہادت پر فخر ہے۔
اہلیہ سپاہی عرفان اللہ شہید نے کہا ’’میری بیٹی مجھ سے پوچھے گی کہ میرے بابا کہاں ہیں، تو میں اسے بتاؤں گی کہ تمھارے بابا جنت میں ہیں۔‘‘
سپاہی عرفان اللہ شہید کی والدہ نے کہا ’’میرا بیٹا جب بھی چھٹی پر آتا تو میرے پاؤں دباتا اور میر ی فرماں برداری کرتا تھا، مجھے اپنے بیٹے کی جدائی کا افسوس تو بہت ہے، لیکن مجھے بیٹے کی شہادت پر فخر ہے۔‘‘
سپاہی عرفان اللہ شہید کے بھائی نے کہا ’’شہید بھائی ہمیشہ وطن عزیز پر قربان ہونے کی دُعا کرواتا تھا۔‘‘
سپاہی عرفان اللہ شہید نے اپنے سوگواران میں بیوہ اور ایک بیٹی چھوڑے ہیں، سپاہی عرفان اللہ اپنی جوانی وطنِ عزیز پر قربان کر کے آنے والی نسلوں کے لیے مشعل راہ بن گیا۔
