The news is by your side.

Advertisement

کوئٹہ: ہزارگنجی فروٹ مارکیٹ کے قریب دھماکا ، 20 افراد جاں بحق، 48 زخمی

دھماکاخیزموادآلوؤ ں میں رکھاگیاتھا

کوئٹہ : ہزار گنجی فروٹ مارکیٹ کے قریب دھماکے کے نتیجے میں 20 افراد جاں بحق اور 48 زخمی ہوگئے، زخمیوں کوبولان میڈیکل کمپلیکس منتقل کردیاگیا ہے۔

تفصیلات کے مطابق کوئٹہ کے علاقہ ہزارگنجی کی فروٹ مارکیٹ کے قریب دھماکہ ہوا، دھماکے کے نتیجے میں بیس افراد جاں بحق جبکہ اڑتالیس سے زائد زخمی ہوئے، جائے وقوعہ پر ریسکیو کارروائیاں جاری ہے اور زخمیوں کوبولان میڈیکل کمپلیکس منتقل کردیاگیا ہے۔

دھماکے کے بعد پولیس، ریسکیو ٹیمیں اور بم ڈسپوزل اسکواڈ موقع پر پہنچ گیا ہے جبکہ سیکیورٹی فورسز نے علاقے کو گھیرے میں لے لیا ہے اور شواہد اکٹھے کرنے کا سلسلہ جاری ہے۔

پولیس کا کہنا ہے کہ دھماکےکی نوعیت معلوم کی جارہی ہے۔

ڈی آئی جی کے مطابق دھماکے میں ہزارہ کمیونٹی کو نشانہ بنانے کی کوشش کی گئی ، دھماکاخیزموادآلوؤ ں میں رکھاگیاتھا، جاں بحق افرادمیں سیکیورٹی اہلکاربھی شامل ہے جبکہ 8 جاں بحق افراد کا تعلق ہزارہ کمیونٹی سے ہے۔

ہزارگنجی دھماکےمیں جاں بحق وزخمی افراد کو سول ، بی ایم سی،شیخ زیداسپتال منتقل کردیا گیا، تینوں اسپتالوں میں جاں بحق وزخمی افرادکےناموں کی فہرست آویزاں کردی ہے۔

اسپتال انتظامیہ کے مطابق سول اسپتال میں 6زخمی،بی ایم سی میں 15 اور 16 زخمی شیخ زیداسپتال میں زیرعلاج ہیں، زخمیوں میں 4ایف سی اہلکاراورایک بچہ بھی شامل ہیں جبکہ جاں بحق افرادمیں بیشترکی تاحال شناخت نہ ہوسکی۔

وزیراعظم عمران خان کی کوئٹہ دھماکے کی مذمت


وزیراعظم عمران خان نے کوئٹہ میں دھماکے کی مذمت کرتے ہوئے زخمیوں کو بہترین طبی امداد فراہم کرنے کی ہدایت کردی ہے۔

وزیراعلیٰ بلوچستان جام کمال کی ہزارگنجی دھماکےکی مذمت


وزیراعلیٰ بلوچستان جام کمال خان نے ہزارگنجی دھماکےکی مذمت کرتے ہوئے کہا شہداکےغم میں برابرکےشریک ہیں، انسانیت کےدشمن دہشتگردکسی رعایت کےمستحق نہیں، ملوث عناصرکیخلاف کارروائی کرکےکیفرکردارتک پہنچایاجائے۔

جام کمال کا کہنا تھا شدت پسندسوچ کےحامل افرادمعاشرےکاناسورہیں، زخمیوں کوعلاج کی بہترین سہولیات فراہم کی جائیں، پرامن ماحول کوخراب کرنےکی سازش کوناکام بناناہو گا۔

چیئرمین سینیٹ کی کوئٹہ دھماکے کی مذمت


چیئرمین سینیٹ صادق سنجرانی نے کوئٹہ دھماکےکی مذمت کرتے ہوئے کہا پرامن ماحول خراب کرنےکی سازش کوناکام بناناہوگا، دہشت گردی کاملک سےخاتمہ اولین ترجیح ہے، دہشت گردکسی رعایت کےمستحق نہیں۔

وہ وقت دورنہیں جب دہشت گردوں کامکمل خاتمہ ہو گا، فواد چوہدری


وزیراطلاعات فواد چوہدری نے کوئٹہ دھماکےکی مذمت کرتے ہوئے کہا دہشت گردامن کونقصان پہنچاکرترقی کونشانہ بناناچاہتےہیں، بہادرقوم اس عفریت کاجرات سےمقابلہ کرتی آئی ہے، وہ وقت دورنہیں جب دہشت گردوں کامکمل خاتمہ ہو گا۔

شہبازشریف کی کوئٹہ دھماکےکی مذمت


قائدحزب اختلاف شہبازشریف نے کوئٹہ دھماکےکی مذمت کی اور کہا اداروں اورعوام نےدہشت گردی کےخاتمےکےلئےقربانیاں دیں۔

کسی دشمن کوامن کی شمع بجھانے نہیں دیں گے، حمزہ شہباز


پنجاب اسمبلی میں قائدحزب اختلاف حمزہ شہبازکی کوئٹہ دھماکےکی مذمت کرتے ہوئے کہا دہشت گردوں کےحملوں کاقوم نےہمیشہ یکجہتی سےمقابلہ کیا، اداروں اورعوام نےاپنےلہوسےامن کی شمع روشن کی ، کسی دشمن کوامن کی شمع بجھانے نہیں دیں گے ۔

مزید پڑھیں : کوئٹہ میں فائرنگ سے 2 افراد جاں بحق

واضح رہے گذشتہ ماہ کے آخر میں بلوچستان کے دارالحکومت کوئٹہ میں نامعلوم ملزمان کی فائرنگ سے 2 افراد جاں بحق جبکہ 2 زخمی ہوگئے تھے۔

اس سے قبل کوئٹہ میں سریاب روڈ پر ہی نامعلوم ملزمان کی فائرنگ سے بلوچستان یونیورسٹی کے سپرنٹنڈنٹ جان کی بازی ہارگئے تھے، پولیس حکام کا کہنا تھا کہ بلوچستان یونیورسٹی کے سپرنٹنڈنٹ کو3 گولیاں لگیں، حملہ آور موٹر سائیکل پر سوار تھے۔

Comments

comments

یہ بھی پڑھیں