لاہور: جنوبی پنجاب سے تعلق رکھنے والی متعدد بااثر شخصیات نے پاکستان پیپلز پارٹی میں شمولیت کا اعلان کر دیا۔
پیپلز پارٹی کے شریک چیئرمین آصف علی زرداری سے جنوبی پنجاب کے متعدد رہنماؤں نے ملاقات میں پارٹی میں شمولیت اختیار کرنے کا اعلان کیا۔ سابق صدر نئے شامل ہونے والوں کو خوش آمدید کہا اور پارٹی مفلر پہنایا۔
اس موقع پر سابق وزیر اعظم یوسف گیلانی، نیئر بخاری، مخدوم احمد محمود اور حسن مرتضیٰ بھی موجود رہے۔
رحیم یار خان، بہاولپور، مظفر گڑھ، راجن پور، بہاونگر، میانوالی، اوکاڑہ، خانیوال کے رہنما پیپلز پارٹی میں شامل ہوئے۔
رسول بخش جتوئی، قطب فرید کریجا، سردار شمشیر مزاری، قائم علی شمسی، سردار اللہ بخش لغاری، پیر جعفر مزمل شاہ، علمدار قریشی، عبدالغفور آرائیں، یاسر عطا قریشی و دیگر نے شمولیت اختیار کی۔
آج اے آر وائی نیوز کو ذرائع نے بتایا تھا کہ جنوبی پنجاب سے پی ٹی آئی چھوڑنے والے 15 سے زائد سابق ایم این ایز اور ایم پی ایز پیپلز پارٹی میں شمولیت کا اعلان کریں گے۔
خیال رہے کہ سابق صدر آصف علی زرداری دبئی سے لاہور پہنچے ہیں۔ وہ پیپلز پارٹی پنجاب کی قیادت سے ملاقات کریں گے جس میں 9 مئی کے واقعات کے بعد کی صورتحال کے تناظر میں سیاسی صورتحال پر تبادلہ خیال کیا جائے گا اور آئندہ انتخابات کے حوالے سے بھی مشاورت ہوگی۔
ذرائع نے بتایا تھا کہ آصف علی زرداری کی مسلم لیگ (ق) کے سربراہ چوہدری شجاعت حسین و دیگر رہنماؤں سے بھی ملاقات کا امکان ہے۔
